Vágs býráð hevur samtykt at fara undir at seta ljósmastrar upp við fótbóltsvøllin í Eiðinum í Vági.
- Hetta er liður í eini longri ætlan hjá Vágs kommunu at betra og menna ítróttarumstøðurnar í kommununi.
Vágs kommuna hevur í longri tíð arbeitt við at fyrireika arbeiðið, og samtyktin merkir, at arbeiðið nú kann fara í gongd.
- Uppsetingin av ljósmastrunum er eitt krav, sum Fótbóltssamband Føroya setir feløgunum sum spæla í bestu og næstbestu deildini. Hetta tryggjar, at dystir kunnu spælast í góðum ljósi.
Í Vági vísa tey á, at við hesum stigi verður eitt stórt fet tikið í at dagføra vøllin og at skapa enn betri karmar fyri bæði leikarar og áskoðarar.
- Eisini verða aðrar íløgur gjørdar á Eiðinum í næstum. Arbeitt verður við at fyrireika ein nýggjan stórkøk, og gólvið í Vágs Høll verður skift í komandi ári.
Haraftrat hevur VB-húsið fingið nýtt gólv, og aðrar dagføringar eru gjørdar, sum skulu lyfta umstøðurnar og tryggja, at bygningurin heldur fram at nøkta tørvin hjá ítróttar- og felagslívinum í Vági.
Við hesum íløgum vísir kommunan, at hon leggur dent á at menna og varðveita góðar karmar fyri ítrótt, trivnað og virksemi í kommununi.
