Hetta merkir, at Samskip hevur keypt 50% av Safari Transport.
Keypssáttmálin millum feløgini varð undirskrivaður í Havn í dag. Einki verður sagt um keypsprísin.
Safari Transport er ein leiðandi fyritøka innan flutning við flogfari og skipi.
Endamálið við samanleggingini er at styrkja fyritøkuna og at veksa um marknaðarpartin.
Fyri tveimum árum síðani, gjørdi Samskip av at fara, av nýggjum, undir rutusigling til og úr Føroyum. Virksemið er nógv økt síðani tá, og Samskip og Safari Transport miðja eftir at fáa ein størri part av marknaðinum.
Samskip steðgar tvær ferðir um vikuna í Føroyum, í Kollafirði og Klaksvík. Ì rutu millum Ísland, Bretland og meginland Europa. Seinasta ár keypti felagið frystigoymslurnar hjá Kloosterboer í Kollafirði og nú hevur felagið keypt helvtina av Safari Transport í Føroyum.
Samstarvið fer eisini at styrkja munandi um støðuna hjá Safari Transport, bæði her heima og uttanlands. Tí viðskiftafólkini kunnu nú brúka tænasturnar hjá Samskip, um tað so verður í Europa, Asia ella USA. Samskip hevur 55 skrivstovur í 22 londum. Harumframt hevur felagið umboð kring allan heimin.
Knút Lützen sigur, at samstarvið hevur stóran týdning fyri Safari Transport. Knút metir, at tað kann geva góðan íblástur til felagið og styrkja felagið í kappingini framyvir.
Safari Transport varð stovnað 01.02.1995 og í dag eru 6 fólk í starvi. Ongin stórvegis broyting verður á Safari Transport. Knút Lützen verður framvegis stjóri, og starvsfólkini verða tey somu.
Knút Lützen sigur, at hann fekk eitt gott tilboð, ið hann ikki kundi siga nei til. Og tá hann frammanundan, hevði eitt sera gott samstarv við Samskip, var hetta bara ein avgreiðsluspurningur.
