Hesa vikuna hava londini, sum verða kallað strandarlond, samráðst um, hvussu fiskiskapurin eftir svartkjafti og Norðhavssild skal vera næsta ár.
Landsstýrið sigur á heimasíðuni, at semjurnar vórðu undirskrivaðar í dag, og tey, sum hava verið við í samráðingunum eru Føroyar, ES, Grønland, Ísland, Noreg og Russland.
Samráðingarnar um norðhavssild fóru fram undir føroyskum formansskapi, og í hesum sambandi samdust strandarlondini um eina mest loyvdu veiðu næsta ár upp á 525.594 tons, og tað er í samsvari við tilmælið hjá ICES, sum er ráðgevandi stovnurin á økinum.
Í svartkjaftinum samdust strandarlondini um eina mest loyvdu veiðu næsta ár upp á 1.161.615 tons og eisini tað er eftir tilmælinum frá ICES
Á myndini eru tey, frá vinstru, Anna Shulaeva, russiskur samráðingarleiðari, Vidar Landmark, norskur samráðingarleiðari, Herluf Sigvaldsson, formaður og føroyskur samráðingarleiðari, Kristján Freyr Helgason, íslendskur samráðingarleiðari og Fabrizio Donatella, ES samráðingarleiðari
