Tað gjørdist tíðliga greitt, at B36 skuldi takast í álvara og at árstalsfelagið hevði tryggja sær Lukasz Cieslewicz, men óvist var hvussu stórur styrkur hann fór at verða.
Tað var annars KÍ, ið stjól myndina fyrstu umførini. Við einum ungum og óroyndum liðið tóku tey flestu á bóli og aftaná fjórða umfar lá liðið saman við EB/Streymi á odda í kappingini.
Í fimta umfari legði B36 seg á fyrsta sinni á oddasessin. Teir vunnu í Gundadali á EB/Streymi við máli, ið Lukasz Cieslewicz skoraði upp á brotsspark, meðan KÍ í evstu løtu tapti heima fyri NSÍ. Umfarið eftir vann B36 í Klaksvík og EB/Streymur tapti í Gundadali fyri HB, sum hóast eina ringa byrjan nú aftur hevði samband við oddin – fyribils í øllum førum.
Í nígginda umfari gjørdist greitt, at B36 skuldi takast av álvara og at HB var í álvarsligum trupulleikum. B36 vann á útivølli móti NSÍ, sum lá teimum næstir, meðan HB tapti heili 4-1 móti einum vælleikandi KÍ liðið.
B36, Víkingur og
EB/Streymur renna undan
Næsti triðingur av kappingini skapti eina mynd av eini kapping í trimum pørtum. Oddaliðini B36, Víkingur og EB/Streymur. NSÍ, sum lá púra einsamalt í ongamannalandi á fjórða plássi, og so restin, sum stríddist fyri ikki at flyta niður.
Liðini í niðari hálvu skiftust um at vera í niðurflytingarvanda. Rundan um summarsteðgin sá út til, at KÍ hevði mist stevið og tapti fyri bæði 07 Vestur og B71 á heimavølli. Felagið valdi tó at halda fast í venjaranum og leikarahópinum.
Í seinasta umfarinum av næsta triðinginum av kappingini kom eitt heilt serstakt mál, tá HB í evstu løtu javnaði til 2-2 í Klaksvík. Tað var nevniliga HB málverjin, Teitur Gestsson, ið gjørdi málið. Tað var eftir at hann var komin framvið í hornasparksstøðu í tíðini, sum dómarin hevði lagt afturat.
Avgerðin í Gøtu
Fyrsti dysturin í seinasta triðinginum avgjørdi fyri nógv hvar meistaraheitið endaði. Í Sarpugerði megnaði B36 at vinna 2-0 á nærmasta kappingarneytanum, Víkingi. Við sigrinum í 19.umfari lá B36 fýra stig frammanfyri Víking á øðrum plássi og fimm stig framman fyri EB/Streym á triðja plássi.
Í botninum stríddist B71, men teir megnaðu ongantíð veruliga at koma bjargingini nær. 07 Vestur, HB, KÍ, B68 og ÍF skiftust um at verða parkera á hinum niðurflytingarplássinum.
Í 23. umfari megnaði EB/streymur at fáa spenning í kappingina aftur við sigri á B36 við Margáir, meðan HB tapti heili 7-1 í Fuglafirði.
Á næst seinasta leikdegi fall endaliga avgerðin í báðum endum. B36 tryggjaði sær meistaraheitið við sigri í Runavík, meðan 07 Vestur við einum 1-0 tapi á heimavølli fyri B68 mátti tað tungu leið niður í 1.deild saman við B71.
Steypakappingin
EB/Streymur er steypaliðið í føroyskum fótbólti seinnu árini og aftur í ár stóðu teir við gullheiðursmerkinum um hálsin. Gongdin til finaluna byrjaði longu tíðliga í apríl í Gundadali móti B36. Felagsliðið vann dystin 2-0. Í fjórðingsfinaluni vunnu sundalagsmenn greiðan 3-0 sigur á NSÍ. Í hálvfinaluni varð mótstøðan B68. Fyrri dysturin á Toftum endaði við málleysum javnleiki. Í seinna dystinum vann EB/Streymur 3-2, men B68 hevði ein risa møguleika í evstu løtu og punktum kundi verið sett fyri steypaævintýrinum hjá EB/Streymi har.
Í steypafinaluni á Summar Festivalinum vann EB/Streymur ein rímuliga sannførandi 3-0 sigur á ÍF. Hetta var ein endurtøka av finaluni frá 2010, sum EB/Streymur eisini vann. Avgerandi løtan kom í seinna hálvleiki, tá EB/Streymur fekk brotsspark, sum fuglfirðingar als ikki vóru glaðir fyri.
Tá saman um kom, so var EB/Streymur omaná og enn eina ferð steypavinnari.
Hetta minnast vit
Lukasz Cieslewicz gjørdist ársins leikari og tað munnu verða fá, ið eru ósamd við tí dóminum. Kappingarárið fer í nógvar mátar at verða sett í samnband við dugnaliga framherjan hjá B36, sum mangan var munurin á einum ella trimum stigum fyri FM vinnararnar.
Málið um stolnar pengar og EB/Streym fylti eisini nógv í farna árinum. Avleiðingarnar av málinum komu fram tá FSF kunngjørdi nýggju reglugerðina fyri fíggjarstýring hjá feløgunum. Framyvir skulu feløgini uppgeva hvørja peru tey skifta í felagshúsinum.
EB/Streymur kom eisini í altjóða ljós, tá teir í dystinum móti HB brendu ikki færri enn trý brotsspørk í fyrra hálvleiki.
2011 gjørdist eitt søguliga ringt ár hjá HB, sum er einasta liðið, ið altíð hevur verið í besti deildini í føroyskum fótbólti, men í ár var um reppið meistararnir frá árinum fyri fluttu niður.
