Við at veita hernaðarligan stuðul til Ukraina, stuðlar Danmark undir eini "øking av ósemjuni" millum Ukraina og Russland.
Tað noyðir Russland at "gera hóskandi tiltøk fyri at tryggja tjóðartrygdina í landinum, eisini av hernaðarligum og tøkniligum slag". Hetta hevur verið ávaringin úr Russlandi fleiri ferðir.
Tað sigur russiski uttanríkisráðharrin, Sergej Lavrov, við Rossiya Segodnya. Talan er um ein stóran, statsligan russiskan miðlabólk.
Tað stendur á heimasíðuni hjá landsins Uttanríkisráði. Ógreitt er, um tað er øll samrøðan ella partar av henni, sum ráðið hevur deilt.
- Eitt og hvørt slag av vápnum, sum vestanlond veita Kiev-stýrinum, umboða lóglig mál og verða í roynd og veru oyðiløgd av russiska herinum, sigur Lavrov.
Hetta er ikki fyrstu ferð, at Russland nevnir Danmark, tá talan er um kríggið í Ukraina.
Millum annað boðaði Mette Frederiksen forsætisráðfrú frá í TV 2 News, at Ukraina kann brúka gávuvápn úr Danmark úr Ukraina og "á russisk mál, um tað er innanfyri altjóðarætt".
Í skrivligari viðmerking segði russiski sendiharrin í Danmark, Vladimir Barbin, at útsøgnin hjá Mette Frederiksen kundi "føra til eina ókontrolleraða menning av ósemjuni."
Síðani Russland herjaði á Ukraina í 2022, hevur danska stjórnin latið ukrainska herin nógvar gávur.
Danmark hevur bundið seg til at lata Ukraina tilsamans 19 F-16 flogfør. Danmark hevur givið Ukraina loyvi at brúka jagaraflogførini í Russlandi.
Sergej Lavrov nevnir eisini gávuna í samrøðuni við Rossiya Segodnya.
- Keypmannahavn er ein av størstu vápnagevarum til Kiev. Danmark er eisini við í venjingini av ukrainskum hermonnum, sambært uttanríkisráðharranum, sum eisini millum annað sigur, at Danmark sendir leiguhermenn til krígsøkið.
Fyrr í desember boðaði ukrainski forsetin, Volodymyr Zelensky, frá, at seinni hópurin av F-16 jagaraflogførum úr Danmark er komin til Ukraina.
Um miðjan august boðaði verjumálaráðið frá, at fyrsta leveringin av donskum jagaraflogførum varð latin Ukraina.
Ritzau arbeiðir við at fáa viðmerking frá forsætis-, uttanríkis- og verjumálaráðnum.
/Ritzau/
