Stóri íslendski fótbóltsmiðilin, fotbolti.net veit at siga, at 49 ára gamli Rúni Klein Joensen tekur við sum málmansvenjari hjá Njarðvík, ið spælir í næstbestu íslendsku fótbóltsdeildini.
Rúni avloysir Helga Má Helgason í starvinum sum málmansvenjari hjá Njarðvík.
Sonur Rúna, Martin og Kaj Leo í Bartalsstovu eru í hópinum hjá Njarðvík.
Rúni hevur verið málmansvenjari hjá besta liðnum hjá Víkingi, NSÍ, kvinnulandsliðnum, og U15, U17 og U21-landsliðunum.
Njarðvík lá í tungum sjógvi í næstbestu íslendsku fótbóltsdeildini í fjør, men megnaði akkurát at bjarga sessinum í deildini.
Kappingin í næstbestu íslendsku deildini byrjar ikki fyrrenn 3. maj.
Njarðvík spælir fyrsta dystin í Lengju-bikaranum, ið kann samanberast við okkara VFF-Cup á heimavølli 10. februar. Dysturin verður móti Þór Akureyri.
