Randi Jacobsen
Fríggjadagin kunngjørdi Jørgen Niclasen, landsstýrismaður í fíggjarmálum frá, at pensjónsaldurin skal hækkast við í hvussu er einum ári, og at henda broyting kemur í gildi næsta ár.
Hermann Oskarsson, búskaparfrøðingur og stjóri á Hagstovu Føroya heldur lítið um hesa ætlan.
- Tað er burturvið at broyta pensjónsaldurin út frá, hvussu stendur til búskaparliga í landinum. Mvg kann broytast, men tað ber ikki til at seta pensjónsaldurin upp ein dag og niður ein annan dag, sigur Hermann Oskarsson.
Pensjónsaldurin kann broytast, men tað krevur eina meira varandi kós at gera slíkt.
Hermann Oskarsson er ikki samdur í, at samgongan ikki hevur nakað val enn at hækka pensjónsaldurin.
- Samgongan hevur eitt val, og tað er at lata vera við at hækka pensjónsaldurin. Tá ið pensjónsaldurin verður broyttur í øðrum londum, verður tað altíð gjørt í breiðari semju, og avgerðin verður tikin við gildi eini 10 ár fram, sigur Hermann Oskarsson, sum leggur aftrat:
- Nógv, sum gjørt verður í dag, er sera illa umhugsað og tann reini ørskapur.
