Mikael Thinghuus er til reiðar at lata Royal Greenland upp í hendurnar á øðrum at reka, tá hann einaferð í summar gevst sum stjóri í felagnum.
Tað skrivar Sermitsiaq í dag.
- Mikael Thinghuus tók við starvinum í felagnum ársskiftið 2010/ 2011 í einari tíð, tá Royal Greenland var í djúpari kreppu, bæði fíggjarliga og strategiskt, skrivar heimasíðan.
Sjálvur sigur stjórin, at hann er errin av tí arbeiði, sum er gjørt og sum er skapt hesi árini.
- Royal Greenland er í dag ein ógvuliga sterk fyritøka, sum veit, hvagar leiðin ber, og eg síggi ljóst upp á framtíðina hjá felagnum, sigur stjórin, nú almenningurin fær at vita, at hann gevst í felagnum.
Sambært Sermitsiaq hevði Royal Greenland sítt besta ár nakrantíð í 2021.
- Fyritøkan hevur í dag næstan tvífalt so nógv starvsfólk í Grønlandi, sum fyri tíggju árum síðan, og høvuðstrupulleikin í dag er ikki arbeiðspláss, men arbeiðsmegi, leggur heimasíðan aftrat.
