Rokið um bústaðin til sálarsjúk við Íslandsvegin, var ein misskiljing. Tað siga Annika Olsen, landsstýriskvinna í almannamálum, Edvard Heen, stjóri í Almannaverkinum og Andras Róin stjóri í Bústøðum í einum felags tíðindaskrivi beint nú. Tey útgreinað ikki, hvør misskiljingin er, men staðfesta, at hon er ruddað av vegnum.
Fundur hevur í dag verið millum Almannamálaráðið, Almannaverkið og Bústaðir, har nógv umrødda bútilboðið á Íslandsvegi varð viðgjørt. - Arbeitt verður nú víðari við at skipa ætlaða bútilboðið á Íslandsvegi 22, og við at fáa øll tey formligu viðurskiftini í mun til bútilboðið uppá pláss.
Les eisini Sirið Stenberg er skakað
- Staðsetingin á Íslandsvegnum er ein bráðfeingis og fyribils loysn, og eru partarnir samdir um at seta ferð á arbeiðið at útvega fleiri nýggjar vardar bústaðir, sum eru bygdir til endamálið.
- Partarnir harmast støðuna, hetta málið hevur sett búfólk og grannalag í, umframt ”tað óhepna signal, ið er sent almenninginum um manglandi inklusión á bústaðamarknaðinum”.
- Eitt er eitt signal, ið gongur beinleiðis ímóti øllum tí, ið arbeitt verður fyri.
Bústaðir og Almannamálaráðið hava eisini eina avtalu um, at Bústaðir útvegar vardar íbúðir í Klaksvík og Runavík, samstundis sum ætlanir eru um at útvega vardar íbúðir í Havnini. Alt hetta júst fyri at tryggja inklusión samsvarandi bústaðapolitikki landsins.
Higartil í ár hava 24 fólk fingið íbúð frá Bústøðum umvegis Almannaverkið. Almannaverkið og Bústaðir eru samd um at halda fram at samstarva í tí góða anda, sum higartil hevur myndað samstarvið partanna millum, siga tey trý.
|
