Rói Ellefsen á Skipagøtu og liðfelagarnir í Hallby, ið spælir í bestu svensku hondbóltsdeildini spældu í dag fyrsta kappingardystin hetta kappingarárið.
Hallby vann í innleiðandi bólkaspælinum stórsigur 40-28 á HK Silwing-Troja á útivølli. Í steðginum var Hallby á odda 22-16.
Rói skoraði síni fyrstu trý mál í einum kappingardysti fyri Hallby í dag.
Tíverri var Pætur Mikkjalsson ikki við á liðnum hjá Hallby í dag.
Pætur greiðir soleiðis frá: - Eg havi tíverri fingið eitt lítið brot í fótin. Eg skal skurðviðgerast týsdagin. Teir ætla at seta eina skrúvu í soleiðis, at tað veksur saman skjótari. Eg veri úti í hálvanannan mánað til tveir mánaðir, um alt gongur væl. Sigur Pætur í stuttari viðmerking.
