Ja, eg siti og hyggi oman á flakavirkið við sorg í hjarta. Við spurninginum, hví er virkið stongt?
Eg havi lagt til merkis, at stóru alifyritøkurnar ella uppisjóvarreiðarir hava rætt eina hond til virkir á teimum plássum, har teir eru slopnir at brúka firðir o.a.
Tí fari eg at venda mær til landsins myndugleikar, løgmann, Høgna Hoydal og Poul Michelsen.
Var virkið í Skopun ikki partur av aliloyvinum á Sandsvág? Um ikki, so havi eg misskilt okkurt.
Eg hoyrdi Bjarna Hammer harmast um, at virkið í Skopun var stongt. Samstundis førdi hann fram, at hann hevði barst fyri, at fiskurin ikki fór óvirkaður av landinum, sendir til lond har fólkið fær eina lítla løn.
Í vár, tá eg var inni sum løgtingsmaður, førdi eg somu sjónarmið fram, fiskur fór av landinum, og til dømis virkið í Skopun bløddi út.
Hetta kann hoyrast á logting.fo.
Eg minnist, at Bjarni Hammer bað um orðið og tók undir við mær. Men Bjarni, tá tú var varur við trupulleikan alt 4 ára skeiðið, hví hevur tú einki gjørt nakað við hetta, tað er ikki gott nokk.
Á sama tingfundi tosaði eg við Høgna Hoydal, eisini hann tók undir við mær, men hví er einki gjørt.
At einki skuldi falla til Skopunar av menningarkvotuni er heilt ótruligt.
Virkið í Skopun hevur tikið ímóti fiski í 51 ár, eigur eitt sovorði virkið ikki rætt til ráðvøru?
Ella ein bygd, sum hevur livað av fiski í út við 190 ár, hevur hon ikki rætt til nakað av rávøru?.
Gevið virkinum í Skopun nakað av botnfiski, so fólkið í Sandoynni sleppur til arbeiðis aftur.
Ella er tað meira umráðandi at lóggeva, so týskarir kunnu fáa loyvi at fiska lógliga í Føroyum.
Í øllum førðum verður tosað meira um tað.
So teir fáa onga bót fyri at hava brotið lógina og fiska ólógliga, men teir fáa nokk bót fyri ikki at hava spann í bátinum.
