Hin 2. september fara fleiri enn 500 sjálvboðin at ganga hús í hús kring alt landið, fyri at savna pening inn til hjálpararbeiðið hjá Reyða Krossi. Reyði Krossur vónar, at innsavnararnir verða væl móttiknir og heitir á fólk at hava reiðan pening við hús næsta leygardag, tá innsavnarirnir koma. Við at lata nakrar krónur í bússuna hjá innsavnaranum kanst tú vera við til at hjálpa, har neyðin er størst, bæði í Føroyum og úti í heimi.
Øll, sum ganga við bússu, eru við í lutakastinum um tveir flogferðaseðlar við Atlantic Airways
Tekna teg sum innsavnara her: https://redcross.fo/studla/tekna-teg-sum-innsavnara/
Skalt tú ganga í Tórshavn, er ikki neyðugt at tekna teg áðrenn – tá ert tú vælkomin at møta í hølunum á Bryggjubakka 10 á sjálvum degnum, millum kl. 10-17. Her verður navnið skrásett, og tú fært eina bússu og rutukort. Allar bússurnar skulu vera inni í seinasta lagi kl. 18.
