Føroyska landsliðið vandi í dag á øðrum sinni á Malta. Tað var sól í gjár, men í dag er grátt, til tíðir vátt og eisini nógvur vindur. Tó var lagið gott til venjing fyrrapartin í dag.
Hoyr samrøðuna við at trýsta á pílin undir myndini
- Umstøðurnar eru fínar, men vøllurin er eitt sindur for harður at venja á. Tað haldi eg teir flestu merktu tað eitt sindur í rygginum, eftir venjingina í gjár, sigur René Shaki Joensen.
Hann spældi sjálvur báðar dystirnar í Nations League móti Malta í fjør. Hann skoraði bæði í 3-1 sigrinum á Tórsvølli, og í 1-1 javnleikinum á Malta.
- Eg haldi vit spældu væl í fyrra dystinum og helt eisini, at mítt avrik var gott. Tað var stuttligt at vinna, men tað er ein blandað kensla við útidystinum. Vit kendu á okkum, at vit høvdu fleiri góðar støðar, men tað blívur ikki til tað síðsta, sigur René og leggur afturat:
- Tað var eisini eitt sindur soleiðis fyri meg. Eg skoraði til 1-0 eftir tveir minuttir, men stutt seinni eri eg íblandaður, tá teir skora til 1-1. Tað var ein løgin kensla, men vit tosa eisini um at tað kendist væl, tá vit spældu bóltin. Tá eru vit omaná, men tá vit byrja at gúppa og spæla upp á teirra premissur vísa vit, at vit kunnu koma í trupulleikar móti øllum. Eisini móti Malta, sum saktans kundi havt skorað í seinna hálvleiki, sigur miðvallarin í Grindavík.
Føroyar spæla leygardagin fyrsta dystin í hesi EM-undankappingini. Vónirnar eru góðar og hesa ferð er Jóan Símun Edmundsson við.
- Um vit spæla upp til okkara besta, so eiga vit at kunna vinna á teimum. Tað sær út til, at vit hava fleiri spælarar í toppformi. Brandur, Hallur og Jóan Símun eru í toppformi, eg haldi eisini at eg eri betri fyri enn seinast vit spældu her, sigur René Shaki Joensen.
René á høgra bakk
Lars Olsen hevur úttikið 20 av 23 møguligum spælarum. Sermerkt er, at bara ein høgri bakkur er úttikin. Tað er Gilli Rólantsson. Landsliðsvenjarin sigur, at hann vónar at Gilli spælir báðar dystirnar á tamb, men helt fyri á tíðindafundinum at René Shaki Joensen kundi verið ein avloysari, sum tað verður neyðugt. René hevur seinastu dystirnar spælt á vinstra vongi.
- Eg má vera erligur og siga, at eg veit ikki hvat eg eri eftirhondini. Í seinastuni havi eg følt, at miðjan er mítt pláss, men eg haldi eisini tað er super at spæla á vinstra vongi. Eg tó ikki siga, at høgri bakkur er mítt pláss longur. Tað var tað kanska fyrr, men eg hevði nokk havt tað trupult, um eg brádliga spældi har, sigur havnarmaðurin á landsliðnum.
Hann hevur fleir ferðir boðað frá, at hann ynskir at koma til eitt størri felag enn Grindavík í Íslandi, men nú heldur hann fram í felagnum hetta árið.
- Eg havi sáttmála, men gjørdi eina roynd at koma víðari. Eitt nú hava vit ikki ein fysioterapeut á liðnum í ár. Tað eru helst nógv ting, sum eg kundi havt negativar tankar um, men velji ikki at hugsa um tað. Nú skal eg bara fáa sum best burturúr fram til september, sigur René Sahki Joensen at enda.
FM1 sigur frá landsdystinum móti Malta, sum verður leygardagin klokkan 17.
