Tvey føroyingalið vóru í leiki í týsku bundesliguni í dag.
Talan gjørdist um ein soltnan dag, har Hákun West av Teigum og hinir í Füchse Berlin taptu á heimavølli, og Vilhelm Poulsen og liðfelagarnir í Hannover-Burgdorf leiktu javnt móti aftasta liðnum í deildini.
Í QUARTERBACK Immobilien høllini í Leipzig endaði tað við javnleiki 27-27 millum Leipzig og Hannover-Burgdorf. Í steðginum var eisini javnleikur. Tá var støðan 13-13.
Vilhelm skoraði tvey mál upp á fimm málroyndir, og hann legði eisini upp til eitt mál (assist).
Hannover er nummar 11 í deildini við 12 stigum.
Týsdagin klokkan 17.45 spælir Hannover dyst á útivølli ímóti slovakiska liðnum, Presov í bólki G í EHF European League. Hannover hevur vunnið seg víðari til høvuðsumfarið.
Hákun West av Teigum og liðfelagarnir í Füchse Berlin taptu á heimavølli í Max Schmelling høllini 33-34 fyri Lemgo, hóast berlinarnir høvdu eina stóra favorittstøðu undan dystinum. Lemgo var á odda 16-14 í steðginum.
Hákun fekk tveir málmøguleikar, og hann setti báðar í netið.
Füchse Berlin er nummar fimm í deildini við 20 stigum. Magdeburg er fremst við 25 stigum, og við einum dysti til góðar.
Hósdagin klokkan 17.45 spælir Füchse Berlin dyst á útivølli móti norska liðnum, Kolstad í bólki A í Champions League.
