Kappingarárið í bestu norsku fótbóltsdeildini fekk ein vakran enda. Liðið úr oljuhøvuðsstaðnum, Stavanger, Viking tryggjaði sær fyrsta meistaraheitið í 34 ár, og nú verður veitsla í býnum komandi dagarnar.
Viking Stavanger vann ein knúsandi stórsigur á Vaalerenga. Í steðginum var Viking á odda 3-0. Viking endaði á 71 stigum.
Samstundis fingu Jóannes Bjartalíð og liðfelagarnir í Fredrikstad bank á Aspmyra leikvøllinum í Bodø. Heimaliðið, Bodø/Glimt vann 5-0 á Fredrikstad í tí sum søgurnar siga gjørdist seinasti dysturin hjá Jóannesi fyri Fredrikstad. Longu í steðginum var Bodø/Glimt frammanfyri við trimum málum.
Fredrikstad endaði á einum sjeynda plássi við 42 stigum. Bodø/Glimt endaði bert eitt stig aftanfyri Viking Stavanger í oddastríðnum, men hevur havt eitt gott ár í Evropa við deildarspæli í Champions League.
Blaðungi Aron Benjaminsen var í hópinum, men slapp ikki á vøllin, tá lið hansara, Kristiansund á heimavølli tapti 1-3 (0-3) fyri Tromsø.
Kristiansund endaði fjórðaftast í deildini við 34 stigum, og hevur sostatt varðveitt plássið í deildini.
