Tað er Sólvit Nolsø, løgtingsmaður fyri Framsókn, sum hevur reist málið í einum grein 52a spurningi til Ingilín Didriksen Strøm, landsstýriskvinnu.
Tingmaðurin spyr soleiðis:
1. Er ætlanin at broyta mannagongd, so tey, ið ikki eiga bústað frammanundan, sleppa framum á bíðilistanum hjá Bústøðum?
2. Hvussu nógv fólk standa á bíðilistanum hjá Bústøðum?
3. Hvussu nógv minkaði bíðilistin hjá Bústøðum í 2023?
Í viðmerkingum til spurningin sigur vísir tingmaðurin á, at fleiri fólk í bestu árum hyggja til okkara grannalond heldur enn Føroyar at búseta seg.
– Tað er ein trupulleiki, sum vit eiga at taka í størsta álvara, tí tað kann geva stórar trupulleikar seinni, um stórir partar av árgangum velja at búseta seg aðrastaðni, sigur hann.
Ein avbjóðing, sum er partur av ítøkiliga trupulleikanum, er tørvurin á bústøðum.
– Felagið Bústaðir er okkara bústaðarpolitiska amboð. Hundraðtals íbúðir eru komnar frá felagnum, og fleiri eru á veg, og Bústaðir hava tænt bústaðarmarknaðinum væl, vísir hann á.
– Men spurningurin er, um tíðin ikki er komin at hava eitt orðaskifti, um Bústaðir ikki skuldu málrættað, hvønn bygt verður til. Eitt nú gera Bústaðir ikki mun á fólki, sum standa á bíðilistanum. Stendur tú ovast á listanum, fær tú eina íbúð bodna. Tað er lættasti máti, men spurningurin er, um tað eisini er rættasti máti, sigur Sólvit Nolsøe, sum tí vil hava landsstýriskvinna at svara uppá, um ætlanin er at broyta mannagongd, so tey, sum ikki eiga hús ella íbúð frammanundan, verða tikin framum tey, sum eiga bústað frammanundan.
