Klaksvík: Tað vóru fleiri skaðar í Klaksvík av nógva regninum, sum kom niður mánakvøldið.
Onkrir vegir, gongubreytir og kjallarar fingu skaða, og menn frá Klaksvíkar kommunu vóru til arbeiðis mánanáttina fyri at avmarka avleiðingarnar av oysregninum.
? Tað ger ikki støðuna í býnum betri, at skaðarnar frá regninum 18. september í fjør ikki eru afturgjørdir enn. Tað tykist sum tað lættari flýtur yvir nú, sigur Steinbjørn Jacobsen, borgarstjóri í Klaksvík.
Floymdi í kjallarar
Helnabrekka vísir seg at verða útsett, tá nógv regn er, og aftur hesaferð skolaði partur av gongubreyt og vegi burtur. Hetta var eitt økið, sum var hart rakt í fjør.
Eisini á Traðargøtu fleyt yvir, og vatnið streymaði oman á Víkavegin. Her hevur ein brekka og onkur kjallari fingið vatnskaða.
? Vit hava fingið fleiri fráboðanir um, at vatn er floymt inn í kjallarar og at vegir og gongubreytir hava fingið skaða. Í morgun eru menn farnir at rudda eftir regnið, segði Steinbjørn Jacobsen fyrrapartin í gjár.
Klaksvíkar kommuna hevur roynt at bøta um skaðarnar eftir rengið í september í fjør, men hetta eru umvælingar fyri nógvar milliónir.
Kommunan hevur søkt landsstýrið um fíggjarligan stuðul til umvælingar, men hevur einki svar fingið enn.
