Síðani flóðalduna hevur svenska stjórnin sýtt fyri at almannakunngera nøvnini á teimum sviunum, sum ikki eru komnir afturíaftur. Orsøkin er ikki, at stjórnin ivast í nøvnunum. Nei, hon vil ikki almannakunngera nøvnini, tí kring landið sita brotsmenn og bíða eftir at fáa at vita, hvørjar íbúðir og hvørji hús standa tóm.
Lars Danielsson í forsætismálaráðnum sigur við Aftonbladet, at myndugleikarnir hava fingið fleiri fráboðanir um, at brotsmenn hava rænt hús og íbúðir hjá fólki, sum ikki eru komin afturíaftur aftan á flóðalduna. Tað sama er hent fólki, sum sluppu frá vanlukkuni við lívinum.
-Íbúðin var snøgt sagt tóm, tá eg kom aftur. Sjálvt sparibússuna hjá soninum høvdu teir tikið, sigur ein 48 ára gamal maður í Lidingø við Aftonbladet.
Gøran Persson, forsætisráðharri, segði fyrradagin, at ger løgreglan av at almannakunngera nøvnini á teimum saknaðu sviunum, má hon eisini átaka sær at verja íbúðir og hús teirra.
