Áhugamálini hjá tí sameinda Ríkisfelagsskapinum viga meira í uttanríkispolitiskum samanheingi enn seráhugamálini hjá Socialistisk Folkeparti (SF). Tí fer danska stjórnin framhaldandi at umboða og verja føroysk og grønlendsk áhugamál í altjóða hvalaveiðunevndini, IWC.
Hetta er niðurstøðan hjá undirritaða fólkatingsmanni, eftir at SF í gjár alment róðið fram undir, at danska stjórnin skal skifta kós í hvalaveiðipolitikkinum hjá Ríkisfelagsskapinum.
Undirritaði hevur í dag havt samband við ymsar partar í politiska umhvørvinum á Christiansborg, og tann greiða ábendingin er, at stjórnin fer at halda somu politisku kós í IWC sum higartil. Tað merkir, at føroyska og grønlendska sjónarmiðið um, at hvalaveiða kann loyvast, tá hon fer fram á burðardyggum grundarlagi, framvegis er almenna sjónarmiðið hjá Ríkisfelagsskapinum í IWC.
Hetta verður eisini kjarnin í tí, sum danski uttanríkisráðharrin, Per Stig Møller, fer at greiða Steen Gade úr SF frá, tá samráð verður í umhvørvisnevndini hjá Fólkatinginum í morgin.
Sjónarmiðið hjá SF um, at Føroyar og Grønland eru minnilutar í danska ríkinum, og tí mugu lata sær lynda, at almenni danski IWC-politikkurin skal broytast, stríðir móti andanum í Ríkisfelagsskapinum.
