Stórur dentur verður í hesum døgum lagdur á at fáa so virðilig viðurskifti sum gjørligt mill-um Føroyar og Danmark.
Formansskapir og stjórnarleiðarar hava hitt hvønnannan í summar, og avtalur eru gjørdar á hægsta stigi.
Nú vit nærkast ólavsøkuni tykist kortini eitt og annað taka seg upp, sum er heldur óheppið fyri víðari gongdina rætta vegin.
Okkum varð lovað egnan myndugleika í egnum uttanríkis- og verjumálum, men hesi lyftir eru nú sópað til viks. Hesi mál eru nú aftur ríkismál - "sådan er det."
Eitt samt løgting hevur samtykt, at hernaðar-lógir ikki skulu kroystast niður yvir okkum, men lítið dugir. Her eru tað vit, ið ráða, siga danir, og teir gera um teimum lystir.
Vit hava fingið mót-stríðandi upplýsingar frá fleiri donskum ráðharrum um fíggjarligu viður-skifti okkara við NATO-felagsskapin.
Fleiri ráðharrar siga danir hava spart risaupphæddir upp á Føroyar og Grønland, meðan aðrir siga, at vit meir at kalla bara hava verið til útlegg.
Óheftir sakkønir í Føroyum og Grønlandi hava roknað seg fram til fleiri 10- tals milliardir, sum danir hava spart, meðan danski verjumálaráð-harrin nú sigur, at vit kosta teimum 144 milliónir krónur í árligum verjuútreiðslum.
"Nær hevur Danmark vart Føroyar hernaðarliga, tá á hevur staðið?" spurdi Janus Kamban, eldri, forsætismálaráðharran, tá hann var her, men fekk einki svar.
Ferð eftir ferð hava danir víst hesum máli frá sær, og ikki vilja viðgjørt tað, men nú fyriliggur ein nýggj støða.
Sitandi forsætis- og sitandi verjumálaráðharri hava við ein munn sagt eini fólkatingsnevnd, at Føroyar og Grønland einki positivt íkast geva til danska búskapin, meðan undanfarnir ráðharrar í somu sessum søgdu tað øvugta.
Danska fólkatingið tolir ikki, at ráðharrar siga ósatt, og her sigur onkur ósatt.
Samskiftið okkara við danir tolir illa hesa tvístøðu teirra framyvir, og vit eiga at fáa greiðu á hesum máli.
Í beinleiðis samráðingum partanna millum vísa danir uppgerðini frá sær, men aðrar leiðir eru nú gongdar.
Fólkatingsumboð okkara eiga sjálvandi at nýta hetta gylta høvið til at fáa greiðu á, hvør ið sigur satt, og hvussu fíggjarligu viðurskifti okkara í NATO-felagsskapinum hanga saman.
