Súkkling
Eftir at veturin hevur syrgt fyri, at kappsúkklingin hjá Rógva Johansen hevur ligið lamin, er vágbingurin nú aftur farin undir kappingarnar.
Fyrsta kappingin í ár varð koyrd í Stjær, og var hetta ein sonenvd innleiðingskapping, sum felagið hjá Rógva skipaði fyri.
Nøktandi úrslit
Rógvi greiður frá, at eftir hansara tykki var talan um eina sera hóskandi kapping, har súkklararnir sluppu at royna seg undir fleiri ymsum umstøðum.
Rógvi koyrir á elituliðnum hjá Cycling Aarhus, og fyri at vera við á hesum, er sjálvandi neyðugt at vera á toppinum so at siga alla tíðina. Allir súkklararnir á liðnum eru sáttmálabundnir, og hetta betrar sjálvandi um venjingarmøguleikarnar, men samstundis merkir hetta, at súkklararnir skulu taka lut í mest sum øllum kappingunum, sum eru í Danmark.
Um kappingina annars sigur Rógvi, at nógvur vindur var hendan dagin, og at hetta eisini sást aftur í súkklingini. Ein bólkur av súkklarunum slapp beinan vegin avstað, og tá Cycling Aarhus hevði ein mann við í hesum, varð uppgávan hjá Rógva og liðfeløgunum at syrgja fyri, at bólkurin ikki varð fangaður aftur av høvuðsfeltinum.
Tað eydnaðist tó einum útbroti at fáa fatur aftur á bólkinum, men tá Rógvi sjálvur eisini var við í hesum, tóktist alt kortini at vera, so sum tað skuldi.
Fyri Cycling Aarhus var endaliga úrslitið sera gott. Rógvi greiðir frá, at teir fingu eitt fjórða-, eitt áttanda- og eitt níggjuna pláss, og at teir eru stak væl nøgdir við hetta. Ikki minst tí kappingin taldi fleiri súkklarar, sum at kalla burturav satsa upp á fyrru hálvu av kappingini.
Spennandi ár
Annars tykist árið í ár at gerast sera spennandi hjá Rógva, sjálvandi treytað av, at hann alla tíðina verður førur fyri at luttaka.
Rógvi greiðir frá, at teir hava eina sera strævna skrá, og millum annað skulu teir fyrst í mei mánaði koyra tvær stórar kappingar innan eitt vikuskifti.
- 5. mei skulu vit koyra Grand Prix Midtbank, sum er ein stór kapping, har teinurin er á leið 200 km til longdar, sigur hann.
Dagin eftir skulu vit koyra Samsung Mobile Grand Prix í Aarhus, har teinurin eisini liggur um teir 200 km. Hetta er annars ein av teimum heilt stóru kappingunum, og millum luttakararnar í kappingini verður millum fyrrverandi heimsmeistarin, Laurent Jallabert.
Annars er nú líkt til, at Rógvi veruliga hevur bitið seg fastan í danska súkklutoppinum, eftir at hann í fjør hevði eitt sera gott kappingarár. Fleiri lið hava víst áhuga fyri at fáa hann í part við sær, men eftir at hava umhugsað støðuna sera gjølla, hevur Rógvi kortini gjørt av, at verða verðandi hjá Cycling Aarhus, og hann leggur dent á, at hann er fegin um hesa avgerð.
