Russiski forsetin, Vladimir Putin, hevur snakkað í telefon við norðurkoreanska leiðaran, Kim Jong-un.
Tað veit Reuters at siga, sum endurgevur almennu tíðindastovuna í Norðurkorea, KCNA.
Sagt verður, at russiski forsetin í samrøðuni takkaði norðurkoreanska leiðaranum fyri hjálpina í krígnum móti Ukraina.
Russiski forsetin segði seg virðismeta hjálpina í russisku Kursk-regiónini, har ukrainski herurin tók ræðið á stórum landaøki.
Tá Ukraina var longst inni í Kursk-regiónini, svaraði russiska landaøkið, sum ukrainar sótu á, til umleið støddina av Føroyum.
Endamálið hjá ukrainska herinum í Kursk var eftir øllum at døma at órógva russisku krígsførsluna í Ukraina annars.
Norðurkorea hevur hjálpt russiska herinum í eitt heilt ár, og sagt hevur verið, at einir 15.000 norðurkoreanskir hermenn hava luttikið í krígnum.
