Privatskúlar við eini námsfrøðiligari stevnu eru vælkomnir, sigur Herálvur
Jacobsen, formaður Føroya Lærarafelags við Skúlablaðið í dag.
- Privatskúlar og eftirskúlar skulu stuðlast og mennast stendur at lesa í
samgonguskjalinum. Sum rímiligt er eigur nýggja borgarlig samgongan at leggja áherslu á tað
privata og eisini privatskúlar. Vanliga nýta vit tó heitið frískúlar fyri at
undirstrika, at talan er um skúlar við egnari stevnu. Serliga frískúlar við
greiðari náms- og frálærufrøðiligari stevnu kunnu verða til stóran íblástur
fyri fólkaskúlan, sigur Herálvur Jacobsen.
- Okkara frískúlar eru stovnsettir av idealistiskum grundum. Óivað tí at
stovnarar og foreldur eru samd um eina skúlakós, sum frálæruliga og í
virðisgrundarlagi brýtur frá tí meira almennu kósini hjá fólkaskúlanum.
- Tá tosað verður um umskipan av skúlabygnaðinum, so liggur í luftini, at
skúlar verða niðurlagdir.
- Hóast tað fyri summi er politisk korrekt at tosa um privatskúlar, og at
brúkarin skal kunna velja, so eru privatskúlar politiskt eitt tvíeggjað
svørð. Løgtingslóg um frískúlar ásetur, at landsstýrisins partur av
rakstrinum verður útroknaður hvønn 1. september í skúlaárinum. Stuðulin
svarar til 85 prosent av góðkendu læraralønunum. Fáa vit fleiri frískúlar, so er
tað klárt í andsøgn til effektiviseringspolitikkin, sum so ella so liggur í
einum nýggjum skúlabygnaði.
- Lat tað beinanvegin verða sagt, at sjálvandi skulu frískúlar stuðlast.
Fíggjarliga avbjóðingin hjá frískúlunum er frammanundan stór, og í tí
andanum okkara frískúlar arbeiða, so ynskja tey neyvan, við einum ov høgum
foreldragjaldi, at forða foreldrum at velja teirra skúla. Og júst tann
spurningin eiga vit at seta okkum; skulu vit at hava privatskúlar, har
inntøka er treytin fyri valinum?
Enn er eingin eftirskúli í Føroyum, men vit áttu avgjørt at havt ein eftirskúla í Føroyum, og skilagott hevði
verið um hann lá í Suðuroy, sigur Herálvur Jacobsen millum annað í greinini.
