So tungt, at Prentmiðstøðin vegna írestandi gjald noktaði at prenta blaðið, sum skuldi koma út í dag, og tí verður Dimmalætting prentað niðri í staðin og síðani flogið til Føroya seint í gjárkvøldið.
– Vit hava ein mánað kreditt hjá Prentmiðstøðini, so vit skylda ikki nógv har.
Tað segði Árni Gregersen, ábyrgdarblaðstjóri á Dimmalætting, við Rás2 seinnapartin í gjár.
Hann sigur, at tað er nógv bíligari at prenta niðri.
– Blaðið, sum kemur í kvøld, kostar minni enn helvtina av tí, tað kostar okkum at prenta tað í Føroyum, tí Prentmiðstøðin er 116 prosent dýrari, sigur Árni Gregersen, ið ikki vil siga, um hetta verður framtíðarleisturin.
Hann leggur aftrat, at vil Prentmiðstøðin ikki prenta blaðið, fáa tey tað gjørt aðrastaðni, tí Prentmiðstøðin skal ikki bestemma, um Dimmalætting kemur út ella ikki.
Árni Gregersen noktar fyri, at Dimmalætting ikki skal hava hildið eina avtalu um, at blaðið skuldi rinda ein stóran part av skuldini niður fyri 1. desember, sum er grundgevingin hjá Prentmiðstøðini fyri ikki at vilja prenta blaðið.
– Dimmalætting hevur áður átt 66 prosent av Prentmiðstøðini, sum Nema keypti, tá Dimmalætting fór á húsagang í 2010, og teir prísir fyri prenting, sum eru galdandi nú, eru teir somu, ið Dimmalætting ásetti í síni tíð sum meirilutaeigari av Prentmiðstøðini, segði Rás2 seinnapartin í dag.
