Tað sigur hann í samrøðu við Kringvarp Føroya í sambandi við verkfallið hjá íslendska Sjómannafelagnum.
Verkfallið rakar í løtuni trý farmaskip hjá Eimskip, nevniliga Brúarfoss, Dettifoss og Selfoss. Øll trý skipini eru skrásett í føroysku altjóða skipaskránni, FAS.
Sambært Jan Højgaard er trupulleikin, at FAS-skipanin framvegis loyvir reiðarum at nýta útlendskar sáttmálar og bíligari arbeiðsmegi.
– FAS-skipanin eggjar til, at føroyskir ella íslendskir sjómenn verða skiftir út við bíliga útlendska arbeiðsmegi, sigur hann við Kringvarpið.
Lógin um føroysku altjóða skipaskrásetingina varð sett í gildi í 1992. Upprunaliga vóru føroysk fakfeløg beinleiðis útilokað frá at gera lønarsáttmálar fyri sjómenn, sum ikki búðu í Føroyum.
Hóast lógin er broytt síðani, loyvir hon framvegis, at útlendskir sáttmálar verða nýttir á skipum í FAS.
Verkfallið hjá íslendska Sjómannafelagnum hevur til endamáls at forða fyri, at sjómenn við lægri lønar- og arbeiðstreytum verða settir í starv á skipunum.
Kelda: Kringvarp Føroya
