Síðsta vikuskiftið varð ein politistur sligin í býnum. Løgreglumaðurin fekk sár á høvdið og noyddist á skaðastovuna, men tað kundi endað verri, um gerningsmaðurin rakti betur. Tí tað, sum hann slóð politistin við, var eitt tungt politiradio, sum hann tók frá politistunum.
Gerningsmaðurin varð sendur í rættin til grundlógaravhoyring og har hendi nakað, sum politistarnir ikki høvdu væntað. Maðurin varð ikki varðhaldsfongslaður.
Absalon Áargarð, formaður í Føroya Politistafelag sigur, at niðurstøðan kom púra óvart á.
- Tá ið ein politistur verður álopin og sligin við einum amboði, so hildu vit, at tað fór at føra til eina varðhaldsfongsling, sigur Absalon Áargarð.
Hann spyr, hvussu føroyska samfelagið raðfestir verjuna hjá løgregluni.
- Tað er okkara arbeiði at fara inn í støður, har fólk eru ill í sær og vit seta okkum í vanda. Tí vænta vit eisini av samfelagnum, at vit fáa eina ávísa verju, sigur Absalon Áargarð.
Ávirkar trygdina framyvir
At rætturin ikki metti hendingina nóg grova til, at gerningsmaðurin skuldi varðhaldsfongslast, fer at fáa onkra ávirkan á føroyskar politistar framyvir.
- Fólk eiga at vita, at gera tey seg inn á ein politist, so fær tað avleiðingar. Og tá ein politistur verður sligin við einum amboðið, so undrar tað, at hendingin ikki verður mett nóg grov til, at gerningsmaðurin verður varðhaldsfonglsaður, sigur Absalon Áargarð.
Og tá umræður tryggleikan hjá politistunum, so er hetta eitt skot fyri bógvin.
- Vit stúrsaðu við av avgerðini. Og spurningurin nú er, um vit eru eins trygg á gøtunum næstu ferð onkur er illur í sær. Tí tað kann jú væl vera, at tann næsti gerningsmaðurin fer at meta tað minni farligt at leypa á ein politist nú, tí hann veit, at hann ikki verður varðhaldsfongslaður, meðan hann bíðar eftir dóminum, sigur Absalon Áargarð.
Hann upplivir tað sum, at støðutakanin í Føroya Rætti í síðstu viku hevur elvt til, at spælirúmið, tá ið umræður hvussu ein kann uppføra seg yvirfyri politinum, nú er víðka.
Niðurstøðan frá Føroya Rætti í samband við varðhaldsfongslingina, er kærd til Eystara Landsrætt.
