Tá var hádramatikkur á skránni í kvøld, tá føroyingaliðini, KA og Breiðablik spældu hálvfinalu í íslendsku steypakappingini á Greifavøllinum á Akureyri.
KA vann 6-4 á Breiðablik aftaná brotssparkskapping, har Klæmint A. Olsen var ein av trimum hjá Breiðablik sum brendi í brotssparkskappingini.
Aftaná vanliga leiktíð stóð á jøvnum 2-2, og aftaná longda leiktíð stóð á jøvnum 3-3.
Klæmint javnaði til 1-1 tá hann hegnisliga drønstútaði bóltin í stongina og inn. Tá vóru 86 minuttir farnir av dystinum.
Í tíðini dómarin hevði lagt aftrat skoraðu bæði liðini, og so máttu liðini í holt við longda leiktíð.
Pætur javnaði til 3-3 fyri KA tá bert tríggir minuttir vóru eftir av longdu leiktíðini. Tað var eisini við einum góðum stútara.
KA 6 - 4 Breiðablik
1-0 Ásgeir Sigurgeirsson ('56)
1-1 Klæmint Olsen ('87)
1-2 Höskuldur Gunnlaugsson ('90)
2-2 Ívar Örn Árnason ('90)
2-3 Höskuldur Gunnlaugsson ('105, br.sp)
3-3 Pætur J. Petersen ('117)
--------------------------------------------------
3-3 Elfar Árni Aðalsteinsson ('120, brendi)
3-4 Höskuldur Gunnlaugsson ('120, skoraði)
4-4 Daníel Hafsteinsson ('120, skoraði)
4-4 Gísli Eyjólfsson ('120, brendi)
4-4 Hallgrímur Mar Steingrímsson ('120, brendi)
4-4 Viktor Karl Einarsson ('120, brendi)
5-4 Ívar Örn Árnason ('120, skoraði)
5-4 Klæmint Olsen ('120, brendi)
6-4 Rodrigo Gomes Mateo ('120, skoraði)
Morgunblaðið skrivar, at talan er um ein hin mest ótrúliga dystin nakrantíð í íslendskum fótbólti.
Í steypafinaluna á Laugardalsvøllinum í Reykjavík seinni í ár møtir KA vinnaranum av hálvfinaluni millum Víking Reykjavík og KR. Vinnur Víkingur kunnu vit fáa eina føroyingauppgerð í finaluni. Gunnar Vatnhamar er á liðnum hjá Víkingi.
Hetta er fyrstu ferð í 19 ár, at KA er í steypafinaluni.
