FM-finalan í tennis varð spæld mánakvøldið. Finalan var ímillum tveir kendar menn í føroyskum tennis seinastu mongu árini, nevniliga Pætur M. Dahl og Jón Brekku.
Pætur gav mótstøðumanninum ein rættiligan avsmurning í finaluni. Hann vann 6-2, 6-0 og staðfesti harvið sína støðu sum stinnasti tennisspælarin her á landi.
Á vegnum í finaluna vann Pætur M. Dahl 6-1, 6-2 á Hjørti Nolsøe, 6-1, 6-1 á Bjarna Wardum og 6-1, 6-3 á Hjalta Mohr Jacobsen.
Jón Brekku vann sín veg til finaluna við at vinna 6-3, 6-1 á Stefan í Skorini, 6-1, 6-0 á Julian Johansen og 6-3, 6-0 á Martin N. Simonsen.
