Sigldu fullir á Norðhavinum
Langa fríggjadag boðaði Tjaldrið løgregluni frá frá, at tað var komið fram á ein 20 tonsara á Norðhavinum, ið tóktist vera manntómur. Men tá menn frá Tjaldrinum fóru umborð sóu teir, at báturin ikki var manntómur, men at menninir umborð vóru dýrandi fullir.
Báturin varð førdur inn á Eiði, har løgreglan tók ímóti skiparanum og førdi hann til lækna at taka blóðroynd. Skiparin verður skuldsettur fyri brot á sjólógina.
Húsaófriður
Løgreglan í Havn sigur, at hon nakrar ferðir um páskirnar er boðsend at koma at basa húsaófriði. Talan hevur í øllum førunum verið um húsaófrið, ið er íkomin av rúsandi løgi.
Eisini hevur løgreglan í Havn tikið onkran fyri at koyra fullur á knallert um páskirnar. Annars hava páskirnar verið rímuliga friðarligar hjá løgregluni í Havn. Okkurt ferðsluóhapp er komið fyri, men talan hevur bert verið um materiellan skaða. Hinar løgreglustøðirnar kring landið boða frá einari stillari páskaviku.
