Eysturríkska løgreglan ivast nú í, um Josef Fritzl var tann einasti, sum visti, hvat fór fram niðri í kjallara hansara. Fyrr hevur ein týskur krimiserfrøðingur sagt seg vera sannførdan um, at kona Josef, Rosemarie, má hava vitað, hvat maðurin fekst við niðriundir, og í dag sigur ein kvinna, sum leigaði frá hjúnunum fyri nøkrum árum síðani, at ein sonur teirra hevði lykil til kjallaran.
-Eg og beiggi mín, sum leigaðu frá teimum, bóðu um at fáa eitt rúm í kjallaranum, men fingu at vita, at har var einki pláss. Nú skilji eg hví, sigur kvinnan við eitt týskt blað.
Løgreglan í Amstetten setir eisini spurnartekin við, hvussu Josef Fritzl bar seg at, tá hann setti hurðina í tað rúmið, sum dóttirin og børnini vóru í. Hurðin, sum er úr stáli, vigar 600 pund, so hann kann ikki hava sett hana í einsamallur. Talsmaðurin hjá løgregluni í Amstetten sigur, at tað kann sjálvandi hugsast, at hurðin bleiv sett í, áðrenn Elisabeth bleiv stongd inni í kjallaranum.
Samstundis kannar eysturríkska løgreglan, um Josef Fritzl kann hava fingist við okkurt annað ólógligt virksemi aðrastaðni enn heima við hús. Tað vísir seg, at hann eigur eisini hús í øðrum býum enn Amstetten, og tey er løgreglan nú í ferð við at kanna.
