Tað kom ilt millum fleiri partar til venjingardystin millum EB/Streym og Skála fyri einari viku síðani. Ein hjálpardómari endaði eisini mitt í rokinum, men einki bendir á at meiri verður gjørt við málið.
Hvørki dómaraleiðarin í Fótbóltssambandinum, Lassin Isaksen, ella formaðurin í dómarafelagnum, Petur Reinert, hava fingið nakra almenna frágreiðing og tí er einki mál. Báðir partar vita um hendingina, sum endaði við einum reyðum korti í part til Róa H. Olsen úr EB/Streymi og Niels Paula Danielsen úr Skála.
Annar hjálpardómarin í dystinum, Vinjard Dam, stóð heilt tætt uppá, tá tað bleiv ilt millum partarnar og legði í millum. Tað hevur hann biðið um umbering fyri, tí er álagt øllum dómarum ikki at leggja fysiskt upp í millum ósemjur á vøllinum.
- Eg eri harmur um støðuna, sum ikki skal koma fyri frá mínari síðu. Eg havi tosa við báðar partar. Eg eri harmur um at tað endaði so rokaligt, tað var ongantíð meiningin. Tað havi biðið um umbering fyri, segði Vinjard Dam við ÍtróttarSosialin mánadagin.
Í vegleiðingini um leikbann stendur undir grein 6, at feløgini hava fulla áyrgd av fyriskipan og døming av venjingardystum. Brot, sum seta fótbóltin í ringt ljós, verða sekta við bót og møguligum leikbanni til leikarar og/ella burturvísing til leiðarar, venjarar og onnur. Hetta kom í gildi eftir eina hending í einum venjingardysti, har ein spælari breyt nøsina.
