Tað eru ongar ætlanir um at áleggja fiskimonnum at taka ókruvdan fisk við til lands, fyri at tryggja, at eisini livur og annar innvølur á fiski, kann verða gagnnýttur.
Tað staðfestir Jacob Vestergaard, landsstýrismaður í fiskivinnumálum.
Kári P. Højgaard, tingmaður, sigur, at nettupp tað, at fáa alla rávøruna til høldar, má vera eitt aðalmál í eini burðardyggari fiskivinnu. Tí heldur hann, at ein sjálvsøgd byrjan kundi verið, at landsstýrismaðurin tók stig til at daggamal fiskur verður førdur til lands, blóðgaður í ísvatni, men ókruvdur.
Men tað ætlar Jacob Vestergaard ikki at gera. Hinvegin vísir hann á, at stig eru tikin til, í eini royndarskipan, at taka ókruvdan fisk til lands, eins og at fáa livur og garnar til lands í størri mun.
Hann sigur, at samskifti er ímillum stigtakara í Suðurstreymoy og Fiskimálaráðið um eina ætlan, ið hevur til endamáls at flyta blóðgaðan, ókruvdan fisk til lands. Men at seta serskild krøv í lóg ella kunngerð um at føra ókruvdan fisk til lands, er ikki ætlanin.
Peningur er settur av til fiskivinnuroyndir og í tí sambandi er fiskimálaráðið altíð til reiðar at stimbra undir slíkar ætlanir.
- Tað er tó tann vinnurekandi, sum má tryggja støðugt grundfesti í eini ætlan at føra ókruvdan fisk til lands, sigur Jacob Vestergaard.
