Borgarstjórin í ukrainska býnum, Sievjerodonetsk í Luhansk-regiónini í Ukraina, sigur, at tað nú er ómøguligt at flyta sivilfólk úr býnum.
Reuters veit at siga, at eini 10.000 sivilfólk framvegis eru í býnum, sum hevur verið fyri áhaldandi russiskum bumbuálopum í longri tíð.
Harðir bardagar hava verið í býnum millum ukrainskar og russiskar deildir. Her búðu einaferð umleið 100.000 fólk. Nú eru 10.000 eftir.
Fyri nøkrum døgum síðan varð sagt, at russar høvdu valdið á umleið 70 prosentum av býnum. Síðan høvdu ukrainar aftur framgongd.
Nú bendir mangt á, at russar hava tikið seg fram aftur, soleiðis at ukrainski herurin í løtuni bert hevur valdið í pørtum av býnum.
Útlendskir tíðindamiðlar vistu í gjár at siga, at ukrainskar deildir framvegis hava valdið á ídnaðarøkinum og onkrum pørtum um hesar leiðir.
Guvernørurin í Luhansk-regiónini segði í gjár, at tað er trupult hjá ukrainsku deildunum í Sievjerodonetsk, tí russar leypa á alt samdøgrið.
