Løgmaður hevur ikki fingið seg at sagt tað, sum hann meinar innast inni, tí tað sampakkar ikki við tað, sum Fólkaflokkurin vil.
Men tað ger hann nú, og tað vísti hann í útvarpinum fyrrakvøldið, tá hann staðfesti, at tilfeingisgjald verður lagt á høvuðsvinnuna, við ella uttan Fólkaflokkin.
Hetta er júst tann boðskapur frá løgmanni, sum bíðað hevur verið eftir. Men tað er týðuligt, at ein ósemja er í eygsjón millum stóru samgonguflokkarnar. Eitt er ríkisveitingin, har Fólkaflokkurin frá at tiga er farin at speireka løgmann. Í Degi og Viku týskvøldið segði Rodmund Nielsen úr Fólkaflokkinum, at tey undir ongum umstøðum góðtaka nýggjar samráðingar um at hækka ríkisstuðulin enn meira.
Og tá løgmaður nú hvessir knívin viðvíkjandi tilfeingisgjaldinum, so er ósemjan eyðsýnd.
Hvat hetta merkir fyri samgongusamstarvið er ilt at spáa um. Men mangt bendir á, at samstarvið er í váða. Men tað kann eins væl enda við, at Fólkaflokkurin bakkar viðvíkjandi tilfeingisgjaldinum, men ger tað, hann er mentur fyri at »minka um skaðan«.
Alternativið er makrelsamgongan millum Sambandsflokkin, Tjóðveldi, Javnaðarflokkin og Framsókn, sum kann gjøgnumføra ein slíkan reform. Ein slík samgonga hevði sett Fólkaflokkin út í politiska myrkrið uttan ávirkan, og valla er Fólkaflokkurin hugaður í at enda í somu støðu sum Tjóðveldi, sum nú skjótt á tíggjunda ári stendur uttan politiska ávirkan.
Avgerðin hjá løgmanni skal takast ein av fyrstu døgunum, tí fíggjarkarmarnir skulu ásetast fyrsta dagin. Og í fíggjarkarmunum skal ásetast, hvussu nógvur peningur skal nýtast til rakstur, og hvussu nógv skal brúkast til íløgur í komandi ári – og hvussu nógvar inntøkur vera.
Kaj Leo Johannesen lat ongan iva vera um, at tað er eitt »must« at krevja eitt gjald frá høvuðsvinnuni fyri fiskatilfeingi bæði á nær- og á fjarleiðum. Tí alivinnan og fiskivinnan koma at verða drívmegin í føroyska búskapinum – og uttan hetta gjaldið fæst hallið á fíggjarlógini ikki burtur fyri 2015, segði løgmaður.
Tað síðsta, sum løgmaður segði, var ikki minst áhugavert: »Eitt tilfeingisgjald, ella eitt gjald, verður lagt á vinnuna, tað eri eg slett ikki í iva um. Tað verður staðfest seinni í ár, og so vóni eg, at tað er tann samgonga, sum vit kenna í dag, sum kemur at gjøgnumføra tað...«
Hetta var ein hóttan, ið vil nakað. Hvør skal siga: Aktar Fólkaflokkurin ikki, so fer hann út í myrkrið.
