Edmund Joensen, fólkatingsmaður, spurdi herfyri danska forsætisráðharran um at almannakunngera skjølini, men hesum noktaði Helle Thorning-Schmidt.
Sosialurin bað fyrr í vikuni Løgmansskrivstovuna um innlit í skjølini og í samskifti við Høgna Hoydal, fyrrverandi landsstýrismann, og Anfinn Kallsberg, fyrrerandi løgmann, um málið. Grundgevingin hjá landsstýrisnum fyri ikki at lata innlit er, at hesir báðir avvarðandi persónar í málinum skulu spyrjast.
Høgni Hoydal hevur boðað frá, at hann als einki hevur ímóti at skjølini verða almannakunngjørd, meðan Anfinn Kallsberg er ímóti. Anfinn Kallsberg segði við Sosialin mikudagin, at hetta fyri hann var eitt prinsippmál, tí um innlit verður givið í hesi innanhýsisskjøl hjá landsstýrinum, so skal innlit latast í øll innanhýsisskjøl.
Sosialurin ætlaði at spyrja Kaj Leo Johannesen, løgmann, hvør hansara støða er til málið.
Vit ætlaðu at fáa at vita frá løgmanni, um hann hevur somu støðu sum Anfinn Kallsberg, um at innlit ikki skal latast, ella um hann heldur sum floksfelagin Edmund Joensen og Høgni Hoydal, at fult innlit skal latast í hesi skjøl. Eisini ætlaðu vit at spyrja løgmann, um hetta var ein avgerð, ið hann sum løgmaður kundi broyta.
Men løgmaður ynskir ikki at gera samrøðu við Sosialin um málið.
Í staðin hevur Sjúrður Rasmussen, ráðgevi á Løgmansskrivstovuni svarað Sosialinum – vegna løgmann, »at hann ynskir ikki at gera samrøðu um málið, og at hann heldur seg til fyrr nevndu fyrisitingarligu avgerð.«
Vert er at leggja til merkis, at tað er Fólkaflokkurin, sum ikki vil almannakunngera tilfarið, meðan Tjóðveldi við spæla við opnum kortum.
Um skjølini einki hava upp á seg, vita vit ikki. Men reint journalistiskt, søguliga og samfelagsliga, hevði tað verið áhugavert at sæð skjølini – kanska serliga tí, at Anfinn Kallsberg stendur so fast við at halda skjølini loynilig. Anfinn Kallsberg var hann, sum formliga avlýsti fullveldistilgongdina og steðgaði ætlaðu fólkaatkvøðuni, sum skuldi verða 26. mai í 2001.
Kunnu skjølini avdúka ósemju millum Tjóðveldi og Fólkaflokk, sum ikki tolir dagsins ljós?
