Men leygardagin sendi Sambandsflokkurin á Christiansborg út tíðindabræv, har kunngjørt verður, at tað als ikki er Aksel V. Johannesen ella Sjúrður Skaale, sum hava æruna av, at Danmark ikki fer at atkvøða »ja« í ES-ráðharraráðnum í makrelmálinum, men at Edmund Joensen eigur alla æruna.
Sambært Edmundi Joensen, so hava hann og Vinstri flokkurin havt samráðingar við donsku javnaðarstjórnina og hava avrátt, at danska stjórnin skal atkvøða blankt. Tí var tað bara eitt politiskt bluff hjá Akseli V. Johannesen, sum í løtuni er fólkatingsmaður fyri Sjúrð Skaale, tá hann í evropanevndini í Fólkatinginum fríggjadagin atkvøddi í móti at geva stjórnini hesa heimild. Saman við Aksel Johannesen atkvøddu eisini bæði tey grønlendsku umboðini ímóti.
Hevði stjórnin ikki fingið stuðul frá Vinstra, so hevði málið fallið í nevndini, og so mátti stjórnin biðið um nýggja heimild.
Men tað tykist rættiliga løgið, at Vinstri og Edmund Joensen nú brádliga draga somu línu sum stjórnin. Edmund Joensen hevur ferð eftir ferð verið eftir Sjúrði Skaale fyri at gera ov lítið og hartað hann fyri at stuðla eini stjórn, sum vil boykotta Føroyar.
Men vit kunnu ikki trúgva øllum, sum Edmund Joensen – og journalisturin hjá honum á Christiansborg – siga, tí teir mótsiga sær sjálvum. Tann 13. januar sendi Skrivstovan hjá Sambandsflokkinum á Christiansborg út eitt tíðindabræv, har kunngjørt varð, at øll andstøðan í Fólkatinginum er ímóti, at ES vil revsa Føroyar. Í sama viðfangi varð boðað frá, at Sambandsflokkurin hevði gjørt semju við Vinstra, Konservativa Fólkaflokkin, Liberalu Alliansu og Danska Fólkaflokkin um, at ES ikki skal seta revsitiltøk í verk ímóti Føroyum.
Orðarætt segði Edmund Joensen, at tað er at fegnast um, at flokkarnir halda saman í hesum máli, ið hevur so stóran prinsipiellan og búskaparligan týdning fyri Føroyar.
Men hetta passaði als ikki. Andstøðan vil revsa Føroyar hart, meðan Vinstri er í parti við stjórnini, sum vil eina millumloysn. Tað sær veruliga út til, at ávirkanin hjá Sjúrði Skaale hevur havt úrslit. Eyðvitað hevur landsstýrið eisini gjørt sítt stóra arbeiði. Men tað tykist heldur mótfallið, tá ein fólkatingsmaður skal nýta so nógva orku uppá at seta hin fólkatingsmannin í ringt ljós.
Vís teg sum ein mann, Edmund. Tak saman hendur við hinum fólkatingsmanninum til gagns fyri Føroyar. Tá verður ikki neyðugt við sjálvrósi!
