Men tað kostar pengar. Tað kostar pengar at hava marglætisskip í sigling, tað kostar pengar at hava og reka eina tyrlu, tað kostar pengar at gjalda bøtur og loysigjøld, tá skipini verða tikin.
Men góðvarin fólk eru allastaðni. Summi gott nokk býttari enn onnur, og man franska Brigitte Bardot bera prísin.
Eitt er í øllum førum vist, at herferðirnar hjá Watson og hansara fólkum als einki hava við náttúruvernd at gera. Og at maðurin er ørur í høvdinum, tað var sjón fyri søgn á Facebook hendan dagin, tá hann segði, at Andres Breivik, fekk hugskotið til illgerðirnar »frá slaktarunum í Føroyum«.
Her fór botnurin undan øllum, sum hevur við Paul Watson og hansara felagsskap at gera. Sjálvandi hava flestu okkara altíð havt størstu vanvirðing fyri honum og hansara virksemi, tá alt virksemið hansara er grundað á lygn og manipulatión.
Útsøgn hansara fellir sjálvandi okkum fyri bróstið. Men tað er ein nógv størri vanvirðing av Noreg og norska fólkinum og lýsir, hvussu hann vanvirðir menniskju í sorg.
Okkara trupulleiki er sum so ikki Paul Watson og hansara fólk. Men okkara trupulleiki er, at tað eru – um enn ikki nógv, men so nøkur góðvarin fólk, sum stuðla hesum virksemi, sum kann vera skaðiligt fyri føroysku tjóðina. Intentiónin er órein og óerlig og at skaða grundarlagið hjá føroysku tjóðini.
Okkara svar skal so bara vera upplýsing til umheimin. Her átti Uttanríkisráðið at gingið á odda og framleitt svartilfar, sum vit øll, hvør í okkara lag, kundu nýtt bæði professiónelt og privat á Facebook og øðrum miðlum.
Men øll í Føroyum – eisini djóraverndar fólk – eiga at duga at síggja, at tiltakið hjá Sea Sheperd – eins og hjá Pete Betune og øðrum – als einki hevur við hvørki umhørvi ella djóravend at gera. Hetta er eitt stunt hjá realitystjørnum at skaffa pengar til egna marglætisvirksemi – og at kroysta eina lítla tjóð, tað skapar yvirskriftir. At misbrúka syrgjandi norsku tjóðina, tað skapar yvirskriftir. At blíva álopin í Føroyum – ella handtikin, tað hevði skat yvirskrifti.
Men latið realitystjørnuna sigla sín egna sjógv í sínum egna Whale Wars – uttan føroyskar luttakarar á nakran hátt!
