Nú skal virksemið hjá Kringvarpi Føroya privatiserast. Fólkini í føstum starvi skulu ikki longur kenna seg trygg, tí arbeiðspláss teirra skal tægast sundur. Tað skal partvíst privatiserast. Privatpersónar, áhugafeløg og kappingarneytar hjá Kringvarpinum sleppa nú at bjóða upp á virksemi hjá stovninum.
Tað hevur landsstýrið avgjørt.
Bjørn Kalsø hevur fingið til uppgávu at kanna, hvussu partar av virkseminum hjá Kringvarpi Føroya kunnu privatiserast.
Og hví verður hetta gjørt?
Er tað fyri at vísa vælvild? Er tað fyri at styrkja public service stovnin Kringvarp Føroya?
Svarið kann bara vera eitt samfelt nei.
Vit kunnu tó siga, at um Kringvarpið hevði havt livað upp til sína skyldu, og um kringvarpsstýrið hevði livað upp til sína skyldu, so var stovnurin helst ikki komin í hesa støðu, har hann hevur fingið bæði fólkið og politikarar ímóti sær. Tí hava politikararnir frítt spæl.
Vit vita, at serliga Miðflokkurin og Fólkaflokkurin ynskja Kringvarpið har piparið grør. Hugsanin er, at vit hava als ikki brúk fyri einum alment fíggjaðum kringvarpi.
So lagaliga løtan er nú. Fólkaflokkurin hevur frítt spæl í Tinganesi, og vil Fólkaflokkurin privatisera Kringvarpið, so verður tað privatiserað.
Kringvarpið er seinastu árini farin ov langt við at lata handilslig áhugamál sleppa fram at stovninum. Tað hevur helst givið landsstýrinum blóð upp á privatiseringstonna. Tí halda tey, at tað ikki er neyðugt, at Kringvarpið skal fíggjast við kringvarpsgjaldi. Kringvarpið hevur gingið ov lætt um krøvini og treytirnar og lagt seg skerfløt fyri at lata handilslig áhugamál fram at í Kringvarpinum – og farin langt, langt út um mark fyri, hvat ein public service støð kann tilláta sær. Soleiðis hevur leiðslan gingið á odda fyri at niðurbróta kringvarpið sum tann mentanarberi, sum tað var.
Vit vita væl, at Kringvarpið ikki hevur bestu umstøðurnar. Men vit vita eisini, at tað ber væl til at gera útvarp og sjónvarp fyri so nógvar pengar, sum Kringvarpið hevur.
Fyri fólkaræði og fyri fjølmiðlarnar sum heild og fyri føroysku mentanina sum heild, so skulu vit hava eitt trygt og gott alment public service kringvarp, sum er alment fíggjað og púra leyst av øllum handilsligum áhugamálum. Tá er stovnurin tryggi bulurin undir fólkaræðinum.
So heldur átti mentamálaráðharrin at verið sína uppgávu vaksin og syrgt fyri, at Kringvarpið røkti sínar public service skyldur leyst av øllum handilsligum áhugamálum – og tryggja stovninum fíggjarliga grundarlagið so ella so.
