Hetta var bert ein roynd hjá Javnaðarflokkinum at vísa vøddar, nú Jørgen Niclasen og Fólkaflokkurin tóku bæði løgmann og samgongufelagar av ræði við at byrja samanlegging av Fiskimálaráðnum og Uttanríkisráðnum.
Javnaðarflokkurin hevur boðað frá, at hann kortini ikki fer at bróta samgonguavtaluna um, at Fólkaflokkurin eigur formannin í fíggjarnevndini.
Fríggjadagin skrivaðu vit á hesum stað, at um løgmaður hevði itið Atli Dam ella Anfinn Kallsberg, so hevði slíkt hent, tí eingin hevði torað at víst so lítla respekt fyri løgmanni, sum Fólkaflokkurin vísir Kaj Leo Johannesen í hesum máli. Og tað er tí, at alt ber til, og at einki fær avleiðingar.
Vit skilja væl, at Fólkaflokkurin er í djúpari kreppu. Hóast veljarakanningar geva Javnaðarflokkinum ringastu undirtøkuna síðani 1932, so hevur Fólkaflokkurin størri organisatoriskar trupulleikar, sum krevja eina stekra og dugnaliga leiðslu. Fleiri lyklapersónar hava vent flokkinum bakið og eru farin at reka virknan politikk í øðrum flokkum. Tað síðsta var, at Poul Michelsen fór úr Fólkaflokkinum og bleiv leysgangari á tingi.
Um Poul Michelsen ger leysasøgurnar til veruleika og stovnar ein nýggjan borgarligan fullveldisflokk saman við enn fleiri virknum fólkafloksfólkum, sum hava ella fara at venda flokkinum bakið, og við borgarligum fullveldisfólkum, sum halda Tjóðveldi vera ov vinstravent, so fær Fólkaflokkurin koyrilin enn meira at merkja. Tá kann hann koma í eina støðu, sum minnir um ta støðuna, sum Javnaðarflokkurin kom í í 1994, tá fleiri grundstuðlar í Javnaðarflokkum vendu flokkinum bakið og stovnaðu Verkamannafylkingina. Tá misti Javnaðarflokkurin so nógva undirtøku, at tingfólkatalið fór niður í helvt – og hesi sár stríðist flokkurin við enn.
Tí er tað ein reellur trupulleiki, sum Jørgen Niclasen situr við. Spurningurin er so bara, um hann klárar at profilera flokkin meira í fíggjarnevndini enn í Uttanríkisráðnum, ella um hann fer at brúka tíðini upp á at profilera seg enn meira við at vera í andstøðu til verandi samgongufelagar til tess at tekkjast Tjóðveldinum, kyrra viðhaldsfólkini hjá Poul Michelsen – fyri á tann hátt at gera seg kláran sum næsta fullveldisløgmannin.
