Nú hevur Jenis av Rana so ofta talað at og hótt við at taka seg og flokkin úr samgonguni, at hetta verður ikki tikið fyri fult longur – í so máta fer søgan uttan iva at endurtaka seg hesaferð. Sjálvur leggur hann dent á, at hann hevur størri ávirkan í samgonguni enn uttanfyri, hóast hann kallar politikkin, sum hann sjálvur er við til at føra, fyri eina vanlukku.
Passar tað, sum formaður Miðfloksins førir fram, so eru tær stóru linjurnar hjá samgonguni ikki serliga væl trektar. Tí Jenis av Rana sigur, at arbeitt verður bara fram eftir fummum. Hann sigur, at partur av játtanarkarmunum eru bara leysir pástandir og púra órgrundaðir, at ongar kanningar eru gjørdar, sum greina viðurskifti nærri, og at hann ætlar sær at biðja Kaj Leo Johannesen koma á fund fyri at siga honum, at hann skal fáa skil á fíggjarpolitikkin og krevja, at tey ymsu tiltøkini í játtanarkarmunum verða eftirkannað.
Jenis av Rana nevnir í samrøðu her í blaðnum fleiri dømi um ræðumyndir av illa grundaðum og óumhugsaðum fíggjarpolitikki:
Flatskatturin er sambært honum ein vanlukka, sum ikki fekk ta ávirkan, sum samgongan lovaði. Hann hevur ikki fingið meira ferð á samfelagið – og ta framgongd, sum vit hava sæð, hevur uppsjóvarfiskiskapurin heiðurin fyri, sigur Jenis av Rana.
Avtøkan av Landsbankanum er ein »fiks idé«, sum saman við øllum hinum bara førir til órógv í samfelagnum.
Tá hetta er skoðsmálið, sum ein av samgonguflokkunum gevur sínum egna politikki, so kundu vit spurt Jenis av Rana, um hann als onga ávirkan hevur á sín egna flokk, og hvat tað er, sum fær hann at halda fram í samgonguni, tá skilið er so ringt sum tað er.
Er tað bara taburettin, sum telur hjá Jenisi av Rana? Hevur tað so stóran týdning fyri Miðflokkin at pynta seg við einum landsstýrissessi?
At skaðin er minni við Miðflokkinum innanborða, tað man vera ein sannleiki við modifikatiónum – tí tingsessirnir hjá Miðflokkinum gera samgonguni hvørki frá ella til, sum løgmaður fleiri ferðir hevur víst á:
– Dámar tær ikki luktin, so far!
