Tjóðveldi hevur fyrr havt uppskot frammi um tað sama, so Javnaðarflokkurin og Tjóðveldi draga somu líni í hesum máli. Men teir fáa eftir øllum at døma onga hjálp frá øðrum flokkum á tingi, og hevði málið fallið, um tað var lagt fyri tingið.
Úrslitið av vánaliga rakstrinum av Kringvarpinum seinastu mongu árini er nú, at allir pengarnir, sum Kringvarpið arvaði frá gamla Útvarpi Føroya eru brúktir – og tað førir við sær, at stovnurin í ár ikki einans hevur hall á rakstrinum, men at samlaða úrslitið fer at hava hall, og tað má tað ikki hjá einum almennum stovni.
Fyri at kunna klára at reka Kringvarpið fyri 54 milliónir árliga heldur enn 60 milliónir, so krevur tað, at Kringvarpið sigur 20 fólkum úr starvi. Men tað kostar so mikið nógv í uppsagnarløn, at Kringvarpið noyðast at siga 10 fólkum afturat úr starvi.
Men sambært tí, sum landsstýrismaðurin segði við Portalin í gjár, so arbeiðir hann við eini loysn, so Kringvarpið fær eina »bleytari lending«. Tað skal helst tulkast so, at hann fer at royna at finna stovninum pengar, so tey sleppa undan hesum eyka uppsagnarpengum.
Trupulleikin við Kringvarpinum er ikki tann, at tey hava 10 prosent minni at húsast við. Tí tann trupulleikan kenna allir stovnar og allir miðlar. Trupulleikn er, at húsast hevur verið eftir inntøkum, sum tey hava droymt at fingið frá lýsingum og spæli. Slíkar inntøkur eru svikaligar, og tí kann ein public service stovnur sum Kringvarpið ikki dúva sítt virksemi á slíkar inntøkur.
Tá politiski myndugleikin ikki vil tryggja stovnins inntøkur við kringvarpsgjaldið um skattin, so skyldar myndugleikin bæði stovninum og brúkarunum, at stovnurin fær eitt trygt grundarlag at virka á. Tað kann saktans verða á einum lægri, men tryggum støði. Vit skulu sjálvandi hava eitt gott og eitt trygt og eitt óheft kringvarp. Tað kundi verið rætt, at latið útvarpið verið útvarp, sum var fíggjað við kringvarpsgjaldinum, meðan sjónvarpið aftur var koyrt í ein stovn fyri seg, sum kundi verið fíggjaður á annan hátt.
Men tað hevur týdning, at inntøkugrundarlagið hjá Kringvarpinum ikki órógvar aðrar miðlar og ikki órógvar trúvirði stovnins.
