Samstundis sum hetta var syndarligt, er hetta eisini ein týðulig ávaring til avvarðandi myndugleikar um trygdina á Føroya Studentaskúla og um trygdina sum heild í føroyskum skúlum og almennum bygningum annars.
Lukkutíð hendi vanlukkan uttan fyri skúlatíð. Ferðsluviðurskiftini við Studentaskúlan í Hoydølum eru milt sagt kaotisk, og tað hava tey verið í nógv harrans ár - tí eitt eljustríð við myndugleikar um vegaføring ikki kann loysast. Hetta kundi í ringasta føri kostað mannalív, um illa vildi til fríggjadagin. Tað sigur seg sjálvt, at 99 ára gamla omankoyringin til skúlan ikki er tíðarhóskandi. Heisn vegurin, sum er fyrsti millum bygdavegur í Føroyum, varð gjørdur til hestavognar 14 ár áðrenn fyrsti bilurin kom til Føroya. Hann er snøgt sagt ikki hóskandi til teir hundraðtals bilarnar, sum koyra til og frá studentaskúlanum hvønn einasta dag.
Vit kunnu bara ímynda okkum, hvat hevði hent, um talan var um eldsbruna í sjálvum studentaskúlabygninginum mitt í skúlatíðini. Brandbilarnir høvdu ongan kjans havt at komið fram at skúlanum, og so als ikki stigabilurin. Har hevði verið eitt kaos - einir 150 bilar og 700 fólk, vit kunnu bara ímyndað okkum katastrofuna...
Hvussu verður og ikki, so skal støða beinanvegin takast til, hvussu hølisviðurskiftini hjá Studentaskúlanum aftur verða bøtt. Rættast hevði verið at bygt ein nýggja tíðarhóskandi skúla - og hví ikki saman við øðrum miðnámsskúla, sum t. d. handilsskúlanum. Tað vildi verið ein visjón, sum vildi nakað. Men í fyrstu syftu áttu myndugleikarnir at nýtt 100 ára dagin hjá Sanatoriivegnum sum vegamótið, har ferðsluviðurskiftini hjá skúlanum í Hoydølum vórðu avgreidd einaferð med alla!
