Á politiska vígvøllinum hevur nógv verið á skránni. Við ársbyrjan høvdu vit seinnu ABC samgonguna, sum tyktist heldur trek og fastlæst – helst tí, at arbeiðslagið og yvirlitið ikki var so gott, sum tað átti at verið.
Fyrst í árinum hendi tað, at Jørgen Niclasen, uttanríkisráðharri, legði frá sær, tí tað bar ikki til bæði at sita sum landsstýrismaður og floksformaður samstundis – ein umbering fyri eitthvørt, sum ikki sá dagsins ljós, og sum Jørgen Niclasen og Fólkaflokkurin ikki meina longur.
Seinni í vár tók Fólkaflokkurin seg úr samgonguni. Tá hendi so tað, at samgongan millum Sambandsflokkin og Javnaðarflokkin helt fram – við stuðuli frá Tjóðveldinum og Poul Michelsen, sum var farin úr Fólkaflokkinum.
Her kom í ljósmála slíkt, vit ikki hava sæð áður í føroyskum politikki. Kaj Leo Johannesen, løgmaður, var krumtappurin í eini breiðari politiskari semju millum samgongu og andstøðu, sum eisini fevndi um eitt longri tíðarskeið, enn verandi valskeið.
Fólk sóu fyri sær, at nú blíðkaði fyri hugaðum monnum – og kvinnum. Nú fingu vit ein progressivan politikk, sum veruliga kunda bera móti málinum.
Eftir valið eru tað fleiri, sum ikki kenna seg aftur í teimum vallyftum, tey hava valt eftir. Fakfeløg hava mótmælt sum ongantíð áður, og samgongan hevur veruliga fingið eina harða byrjan.
Men sambært veljarakanning, sum Gallup gjørdi fyri Sosialin, so hevur hetta ikki tikið grundarlagið undan samstarvinum hjá borgarligu reaktioneru samgonguni, hóast tært er av grundarlagnum – og hóast andstøðan hevur styrkt sína støðu.
Mest kontroversiella málið er helst flatskattin og skattingin av pensjónsinngjøldum, sum er grundarlagið fyri flatskattinum. Fakfeløgini halda tað ikki vera rímuligt, at tey lágløntu skulu gjalda gildið fyri skattalætta til tey ríku. Neyvan hevði nakar hetta í tonkunum í valstríðnum, hóast Fólkaflokkurin hevur havt hetta í síni stevnu.
Men valt er valt, og vit hava tað stýri, vit hava valt. Fakfeløgini hoknaðu í stríðnum um flatskattin, og nýggja borgarliga samgongan vann. Men skulu fakfeløgini – og stríðið um barrikadurnar takast fyri fult í framtíðini, so mugu fakfeløgini taka sær aðrar partar fyri.
Spennandi verður at síggja, hvussu leikur fer.
