Andstøðuleiðararnir Høgni Hoydal og Aksel V. Johannesen hava tí sett Kára P. Højgaard ein grein 52 spurning, sum landsstýrismaðurin kortini ikki æltar sær at svara, fyrr enn freistin er farin. Hann kann brúka 10 yrkadagar at svara, og hann hevur sagt, at hann ætlar at pjaka sær so mikið við svarinum, at tað ikki kemur fyrr enn til síðstu freist, sum er sama freist, hann hevur at fáa sáttmálan í hús við útlendska felagið.
Men Sosialurin veit, at tað ikki bara eru andstøðuleiðararnir, sum eru ørkymlaðir. Tì eisini landsstýrismenn eru illa hýrdir um hetta mál, tí teir vita als einki um hesar ætlanir. Sosialurin veit, at onkur landsstýrismaður krevur, at greitt verður frá málinum á næsta landsstýrisfundi.
Viðkomandi landsstýrismaður heldur, at tað er púra burtur úr vón og viti at lata einum útlendskum privatum íleggjara eina so stóra verkætlan, sum fer at kosta føroyingum milliardir meira, enn hon hevði gjørt, um talan var um eina almenna føroyska verkætlan, sum landskassin veðhelt fyri og tí fekk lagaligari lánstreytir.
Og tað er áhugavert, at politikarar innan sum uttan fyri samgonguna nú fara at røra upp á seg.
Høgni Hoydal nevndi í Sosialinum mánadagin, at verkætlanin er vorðin eitt persónligt prestisjuprojekt hjá landsstýrismanninum, sum partú vil hava sítt navn á tunnilin. Eingin ivi er um, at Kári P. Højgaard setur alt sítt politiska lív í veð fyri hendan tunnil, sum fyri hann og hansara lokalpolitisku framtíð hevur sera stóran týdning.
Men politikkur er annað enn at byggja sær varðar. Og valla fær landsstýrismaðurin so stórt vald, at hann einsamallur kann binda okkum at rinda útlendingum milliardaupphæddir, sum kunnu verða óneyðugar.
Men vit vita ikki, hvussu málið liggur. Og tá arbeitt verður soleiðis í duldum, so kunnu nógvar misskiljingar spyrjast.
Tað kann vera, at tað neyðugt hjá landsstýrismanninum at ganga varisliga við hurðunum. Men at dylja eina slíka ætlan fyri landsstýri og løgtingi til undirskrivað er, tað er ikki fólkaræði.
Nógv bendir á, at heldur ikki landsstýrismenn hava tað álit á Kára P. Højgaard, sum tí valla sleppur at einsamallur at gera av lagnuna hjá Skálafjarðartunlinum.
