Men tað gjørdu teir ikki. Hinvegin er Høgni Hoydal firtin inn á Lene Espersen, tí hon ikki spurdi okkum og grønlendingar áðrenn. Tí hon røkir okkara trygdarpolitikk. Og rætt hevur Høgni Hoydal. Sjálvandi átti hon um ikki annað at kunnað okkum, so kundi hon látið sum um, at vit vórðu tikin upp á ráð.
Men hinvegin hevði Høgni Hoydal møguleikan at atkvøða NEI ella blankt á fólkatingi fríggjadagin. Men tað gjørdi hann ikki. Hann atkvøddi faktiskt JA. Og ja atkøvddi hann við ikki at møta upp. Og flestu fólkatingslimir hava eina smarta fráveruskipan – vit kundu til stuttleika kalla tað eina skulkiskipan. Um ein, sum fer at atkvøða nei ikki møtir upp, so letur ein, sum ætlaði at atkvøða ja vera við at atkvøða. Hetta kalla tey eina »claringsskipan«, men slíkari skipan er Høgni helst ikki partur av.
Men hann er ein av teimum, sum møtti ringast upp til løgtingsfundir í fjør. Hann hevur funnist at Sosialinum fyri at almannakunngera fráverurnar hjá tingfólkum, tí tær vísa ikki veruligu myndina av, hvørji tingfólk gera nakað til nyttu. Tað kann hann eisini hava rætt í, men løgtingið skrásetir á hvørjum fundi, hvør møtir. Hesi tøl eru almenn. Men tá man skal sita í parlamentum í fleiri londum, so sigur tað seg sjálvt, at man fær trupulleikar at møta upp.
Meðan Høgni Hoydal var landsstýrismaður í 2008 røkti Sjúrður Skaale fólkatingsstarvið fyri hann. Sjúrður Skaale staðfesti tá, at tað ber ikki til at gera eitt ordiligt arbeiði í báðum parlamentunum. Tí segði hann tingsessin frá sær permanent, sum tann fyrsti nakrantíð. Men Høgni Hoydal hevur ongan trupulleika at røkja báðar sessirnar og at standa á odda fyri andstøðuni á løgtingi.
Øll eru samd um, at Gadaffi er ein búrhundur, sum skal fáast frá valdinum. Men er tað nú rætt at bumba landið sundur og saman? Skulu vit hava eitt nýtt Irak? Er tað rætt, at so nógv sivilfólk skulu líða?
Amerikanarar hava verið fleiri ferðir á mánanum. Løgið, at teir ikki klára at senda onkra Schwartznegger-typu til Libya at handtaka – ella gera av við – Gadaffi. Ella hevur tað so stóran týdning fyri at vesturheimin at royna sína krígsútgerð?
Tað má kennast beiskt at vera við til at senda eitt land í kríggj. Í so máta skilja vit sera væl Høgna Hoydal. Men man kann ikki ráða allastaðni.
Atkvøðugreiðslan í Fólkatinginum fríggjadagin var tó greið: 110 atkvøddu fyri. Eingin ímóti og eingin atkvøddi blankt.
