Tað sum kortini kann undra er, at tað er Fólkaflokkurin sum leggur rygg til størstu afturgongdina. Allir flokkarnir í samonguni ganga aftur, men mest Fólkaflokkurin, sum missir hálvtfjórða prosent, meðan teir smáu flokkarnir ganga aftur við ávikavist 1,0 og 1,4 prosentum. Sambandsflokkurin gongur 0,3 prosent aftur.
Tað er ikki so løgið, at samgongan gongur aftur eftir allar tær ákoyringar, hon hevur fingið. Men tað sum kortini undrar er, at tað er Fólkaflokkurin, sum gongur mest aftur, meðan Sambandsflokkurin so at siga verjir borg.
Av onkrari orsøk vilja veljarar Fólkafloksins ikki løna honum, at hann hevur fingið eitt av høvuðsmálinum hjá flokkinum ígjøngum – flatskattin. Um vit eru samd við Fólkaflokkin ella ikki, so er tað eitt politiskt bragd, sum flokkurin hevur framt við at fáa hetta málið samtykt so skjótt og so lætt.
Hinvegin hevur Sambandsflokkurin einki fingið burturúr. Flokkurin fór til val upp á at hækka blokkstuðulin við 200 milliónum. Hendan ætlanin miseydnaðist. Fólkaflokkurin er speirikin við, at hann hevur kúvent í loysingarmálinum, er vorðin ein sambandsflokkur, sum fer til Danmarkar at bidda pengar. Men øll vita, at hetta hevur bara verið spæl fyri gallarínum. Men kanska veljararnir hjá flokkinum ikki hava fatað hetta?
Hinvegin er tað Sambandsflokkurin, sum hevur vunnið upp á at reka fólkaflokspolitikk, meðan Miðflokkurin og Sjálvstýrisflokkurin tapa – kanska upp á at selja sína sál fyri valdið.
Framgongdin hjá Tjóðveldinum og Javnaðarflokkinum eru stór, men tó ikki sannførandi. Fakfeløgini hava ikki lønt hesum flokkunum fyri stuðulin, tey fingu undir verkfallinum ella undir flatskattaorrustuni. Ella var nakar stuðul til fakfelagsrørsluna haðani?
Eingin flokkur fór upp á barrikadurnar hjá fakfeløgunum og talaði teirra søk. Andstøðuflokkarnir vóru ógreiðir – og annaðhvørt dugdu teir ikki ella vildu teir ikki stilla seg øksl móti øksl við fakfeløgunum.
Tá tann ágangur, sum landsstýrissamgongan hevur ført móti fakfeløgunum seinastu tíðina ikki fær tey at stuðla Javnaðarflokkinum og Tjóðveldisflokkinum, so má tað vera tí, at hesir flokkar ikki røkja áhugamál verkafólksins betur, enn Sambandsflokkurin og Fólkaflokkurin.
