ODDAGREIN: Fáa útbúgvið fólk heimaftur

Vit hava fyrr á hesum stað víst á, at vit hava skip­an­ir í Før­oy­um og í Dan­mark sum bein­leiðis lokka ný­út­búnar før­oy­ing­ar at verða ver­andi í Dan­mark, með­an tey leita sær eft­ir ar­beiði, held­ur enn at flyta heim til Føroya.

Okkara arbeiðsloysisskipan er slett ikki fyri ný­útbúgvin fólk – um tey so koma úr Føroyum ella utt­an­lands. Hetta er ein veikleiki, tí í eitt nú Dan­mark hava tey a-kassa sum loft­ar ný­út­búnum fólkum, sum fáa slak­ar 14.000 krónur um mánaðin, með­an tey í Føroyum fáa 0 krónur. Hví tá flyta heim til Føroya?

Tingkvinnan Eyðgunn Samu­el­sen hevur lagt fyri tingið uppskot til sam­tykt­ar, har heitt verður á lands­stýr­is­mannin í vinnumálum, Johan Dahl, um at fyrireika og at leggja fyri Løgtingið lógaruppskot, ið ger tað møguligt hjá lesandi at koma í ALS eftir loknan lestur.

Galdandi skipan loyvir ikki hes­um. Men fyri tað um skipanin er so stirvin, so er ikki vist, at hon ikki kann broytast. Og tað er júst tað, sum er uppgávan hjá politikarunum, at gera okkara skipanir soleiðis, at tær ikki reka fólk av landinum – ella bein­leiðis forða fólki at flyta heimaftur.

Tann stóri trupulleikin er, at fólk ikki kunnu tekna seg í ar­beiðs­loys­is­skip­an­ina, meðan tey søkja ar­beiði eftir loknan lestur. Og tá er tað líka mikið, um tey hava goldið nógv í skipanina, áðrenn tey fóru undir lesturin, um tað er var her heima ella uttanlands.

Loysunarorðið hjá lands­stýr­i­num upp á allar slíkar spurningar er bú­skap­ar­vøkstur, sum nærmast er vorðið ein floskul. Tað skerst ikki burt, at pol­itikarar mugu gera nøk­ur ítøkilig tiltøk til tess at fáa fólk at flyta heimaftur til hetta landið, so fólka­talið ikki minkar til óbóta­lig­an skaða.

Hetta málið, um at tryggja teim­um, sum júst hava nomið sær út­búgv­ing, fíggjarligt grundarlag, með­an tey skulu finna sær arbeiði og finna seg til rættis í okkara sam­felag, er ein trupulleiki, sum ikki má und­ir­metast.

Annað er so tað, at gott hevði verið við eini ná­grein­i­lig­ari gjøgn­um­gongd av, hvør tørvur er á hvørj­um útbúgvingum, sum fólk kundu fyrihildið seg til, tá tey velja sær útbúgvingarleið.

Men í øllum førum eiga øll segl at verða sett so­leðis, at hesin trupulleikin verðu­r loystur á einhvønn hátt. Kann­ing­ar vísa, at 150 ikki velja at flyta heim­aft­ur ? hvørt ár. Hetta er eitt ov stórt tilfeingi at lata fara fyri skeytið...