Um fólkatingsval varð útskrivað nú ella verður tað um stutta tíð, hvussu kemur tað so við hjá føroysku flokkunum. Eingin ivi er um, at eitt val í næstu framtíð kemur væl við hjá andstøðuni, sum fær eitt gott høvi at nýta hetta valstríðið sum eina aðalroynd til løgtingsvalið. Hinvegin er spurningurin, hvussu væl samgonguflokkarnir eru fyri. Eftir trý ár í sátt og semju og eisini við fleiri góðum samfelagsgagnligum úrslitum er samgongan komin í innanhýsis stríð. Hetta kann gerast ein meinbogi, tá og um fólkatingsval verður áðrenn eitt løgtingsval, men hetta nýtist ikki at gerast ein meinbogi. Tað velst alt um, hvussu taktiskir flokkarnir verða og um teir megna at leggja klandrið til viks í fólktingsvalstríðnum.
Eitt val og annað! Stóri spurningurin er, hvussu eitt fólkatingsval í hesum árinum fer at ávirka eitt møguligt løgtingsval í januar. Ymiskt hevur bent á, at løgmaður meira ella minni óviljaður fer at vera noyddur at útskriva val í ótíð. Stevið í samgonguni hevur ikki verið hitt besta síðan Laksáfoss byrjaði sín solosong og stevið tykist bert at versna. Eitt val hevði ivaleyst reinsað luftina. Men nær skal tað verða, tað er spurningurin. Løgmaður hevur fingið nakað at hugsa um. Hann ger helst beint í at ráðleggja við samgonguna, áðrenn hann tekur sína avgerð, ein avgerð, ið verður alt annað enn løtt m.a. tí, at enn standa stór og týðandi samgongumál í hálvum gekki – mál sum samfelagið ikki hevur ráð at hava liggjandi sum óloyst í mánaðir og ár. Og so er tað uppskotið um Føroyar sum eitt valdømi. Vil løgmaður hava tað gjøgnumført skjótast ella vil hann, at tað skal bíða og út frá tí skriva út val í næstum?
Sosialurin
