Vit bíða nú eftir at frætta, hvussu álvarslig støðan er.
Tað var annars í fjør, at Thor gjørdi av at keypa og umbyggja teir tríggjar trolararnar, Poseidon, Hercules og Athenu og gera teir út til fiskiskap í Kyrrahavinum. Tað vildi tó so illa til, at Hercules fyrr í ár varð rakt av herviligum eldi, sum hevði við sær, at skipið alt brendi, men tað, sum verri var, 11 av manningini doyðu. Henda hending skuldi tó ikki standa einsamøll. Nú nakrar mánaðir seinni var aftur eldur í enn einum av skipunum hjá Thor.
Reiðarin og øll onnur standa spyrjandi. Hvussu ber tað til, at eldur kemur í tvey av flaggskipunum hjá eina og sama reiðaríi við so stuttum millumbili! Tilvild ella eru aðrar orsøkir? Eldáseting er so altíð ein teoretiskur møguleiki, men helst óhugsandi. Vánaligt arbeiði í sambandi við umbygging? Her hava skipini verið góðkend av Klassa og øðrum eftirliti.
Øll henda óvissa hevur gjørt, at umfatandi tøkniligar og aðrar kanningar vórðu gjørdar umborð á tí triðja risaskipinum, Poseidon, tá tað kom til lands saman við Athenu.
At talan er um ein dyggan smeit fyri reiðarí er eingin ivi um. Hesar hendingar kunnu vera við til at steðga menningini av tí annars vakstrarríka Thor, sum eftir fáum árum hevur ment seg til at vera ein av okkara fremstu fyritøkum. Fyri føroyska trygging eru hesar hendingar eisini skot fyri bógvin. Vónandi eru endurtryggingar, sum taka stóra partin av skaðunum, tó at hetta fer at svíða hjá trygging eins og reiðaríi. Vit mugu so bara vóna, at hesi óhapp ikki taka mótið og skapanarhugin frá Thorfólkunum, sum higartil hava prógvað, at har dugnasemi og vilji/treiskni ganga hond í hond, har er ávøkstur.
Sosialurin
