Móttakararnir av hesari breiðsíðu eru ivaleyst Páll á Reynatúgvu og Gerhard Lognberg. Teir hava gjørt Sandoyartunnilin til hjartamálið. Formaðurin hjá Tjóðveldi og Føroya varaløgmaður setur sostatt samgonguna uppá spæl í síni formansfrágreiðing. Hetta hevur sjálvsagt alt nakað at gera við, tað, sum hann í røðu síni sigur um fíggjar- og búskaparviðurskiftini og samfelagsligar raðfestingar. Hetta er væl skiljandi, tí her er nógv, sum skal hanga saman: blokkniðurskurður, skúlabyggingar, Skálafjarðartunnilin, útbygging av flogvøllinum og hartil herímillum fleiri mál, sum flokkur formansins hevur ábyrgdina av og sum mugu loysast eftir eini fastlagdari ætlan, um nøkur vón skal vera um gott úrslit av fólkaatkvøðuni, sum verður longu um tvey ár.
Tað kann tó undra, at formaðurin fer so harðliga út móti Gerhardi og Pálli, og tað undrar ikki minni, at tað er varaløgmaður og ikki løgmaður, sum reiggjar koyrilin. Tað liggur millum reglurnar, at makka teir ikki rætt, verður Sjálvstýrisflokkurin tikin inn og teir ólýdnu kunnu sigla teirra egna sjógv. Men so er spurningurin um ein slík samanseting fer at gera parlamentarisku støðuna lættari. Man Kári Højgaard ikki fara at standa eina fast uppá Skálafjarðartunnilin sum Páll og Gerhard halda fast um Sandoyartunnilin? Tað er tí ein spurningur, hvørt hesar móthóttanir eru gagnligar fyri samgonguna og hennara politikk. Hevði tað ikki verið skilabetri at fingið ein dialog við Páll og Gerhard heldur enn at hótta, og fáa hendan dialogin í sambandi við eina samlaða útbyggingarætlan fyri øll tey stóru og tungu økini so sum infrakervi, skúlar, mentanarhús, flogvøll o.m.a. Í hesum sambandi kundu mong ivaleyst hugsað sær at vita, hvørja viðmerkingar landsins løgmaður hevur ella um varaløgmaður, talar vegna løgmann eisini í hesum máli.
Sosialurin
